Notícies Veir istoric
Eth plen der Ajuntament de Vielha Mijaran apròve eth pressupòst dera corporacion entà 2016 e er expedient de dissolucion de Vielha Gestion S.A
Es pressupòsti garantizen era prestacion des servicis basics que prèste er Ajuntament
Aguest maitin s’a amiat a tèrme eth plen ordinari der Ajuntament de Vielha Mijaran en qué s’an aprovat es pressupòsti tar an 2016.
Segontes a expressat er alcalde Juan Antonio Serrano: “Aguesti pressupòsti asseguren era prestacion des servicis basics en municipi, ath temps que mèrquen dejà eth camin qu’er equip de govèrn vò seguir”. En aguest sentit Serrano tanben a manifestat que “per prumèr còp s’abilite ua partida entà promocion toristica deth municipi e se priorizen partides referentes ara seguretat, per çò que hè ath compliment des ordenances municipaus (gossets, civisme…) e neteja de carrèrs”.
Pendent eth plen s’a tramitat tanben er expedient de dissolucion dera societat Vielha Gestion SA, coma tràmit de prenuda en coneishement entà dar compliment ara lei e trasladar ara assemblada extraordinaria e conselh d’administracion dera societat aguesta decision. Atau madeish se cree ua comission de seguiment formada per alcalde de Vielha Mijaran e un representant de cadun des partits dera oposicion e er airau de secretaria e intervencion e era geréncia dera societat, entà hèr eth seguiment deth procès de dissolucion.
En aguest sens, er alcalde Serrano a hèt: “era demana formau ath pòrtaveu deth grop de CDA, Alex Moga, coma asesor deth Departament de Governacion tà ahèrs dera Val d’Aran, tà qu’era Generalitat de Catalunya s’implique en aguest ahèr e ajude ar Ajuntament de Vielha Mijaran entà solucionar-lo”. Ath temps que tanben a destacat e arregraït :”era volontat que pendent aguest plen an manifestat es grops dera oposicion tà trabalhar amassar en aguest ahèr”.
Finaument eth plen a aprovat tanben ua mocion damb motiu deth dia contra era violéncia de genre que se celèbre eth 25 de noveme, e a realizat ua declaracion exprèssa de condemna des atemptats dera passada setmana en París.
18/11/2015