Notícies Veir istoric
Vielha e Mijaran fomente era activitat esportiua entre es majors deth municipi
Aguesta setmana s’an installat dues biciclètes estatiques en Casau deth Jubilat de Vielha, en tot crear un nau espaci d’activitat fisica que permeterà amiar ua vida mès saludable as usatgèrs.
Eth Ajuntament de Vielha e Mijaran a iniciat aguesta naua accion tre eth besonh de completar era aufèrta de prestacions e servicis qu’a actuauments eth Casau deth Jubilat de Sant Miquèu de Vielha e fomentar era practica d’activitats fisiques e esportiues entre es sòns associadi.
Er objectiu principau ei melhorar era qualitat de vida des ciutadans e facilitar-les poder amiar ua vida mès saludable, en tot realizar exercici jornalièraments. Ath delà, laguens eth calendari d’activitats dirigides dispòsen de Yoga e classes de Bollywood, çò que les permet auer ua programacion jornalièra damb activitats fisiques e de baish impacte.
Juan Antonio Serrano, baile de Vielha, visitèc eth darrèr dijaus pera tarde es installacions entà conéisher de prumèra man es besonhs des usatgèrs e animar-les a que practiquen espòrt toti es dies, " ara es majors de Vielha e Mijaran an un espaci interior esportiu adaptat entà eri en tot auer en compde es mesi de mau temps qu’auem en Aran". Tanben manifestèc era importància dera activitat fisica entara salut e qu’eth Casau deth Jubilat ei cabecièr ena província en disposar de dues mashines esportiues entath sòn centre.