Notícies Veir istoric
Era Bibliotèca Generau de Vielha publica era memòria de 2013 e definís es objectius generaus de 2015
Era Bibliotèca Generau de Vielha a publicat era memòria de 2013 e tanben a definit es objectius generaus de 2015. Es 46.148 visites ath long der an (en noveme damb 5.533, eth mes mès concorrut) demòstren eth bon estat de forma e moment que viu eth centre, que compde damb un hons documentau de 35.873 volums.
D’entre es donades destacables, s’an distribuït 6.922 carnets, un exit donques ena Val d’Aran viuen ues 10.000 persones. Deth totau, 5.573 an estat entà adults, que contunhen en tot èster es consumidors mès assidus. Des 20.102 prèsti que s’an realizat, 13.029 an estat entà adults. E es volums mès demanadi son es libres (12.334), seguidi deth materiau audiovisuau damb 5.120 prèsti.
En 2013 tanben s’a inaugurat er espaci culturau Aran-Occitània. A nivèu d’activitats, s’an realizat 238 damb un totau de 5.259 assistents. Entre eres trobam clubs de lectura, ‘libres entà creisher’, ‘a grapes pera bibliotèca’, talhèrs e charrades, es activitats der an Salvador Espriu, damb motiu deth 100 anniversari deth naishement deth poèta catalan, e eth projècte ‘Alícia al país de les meravelles’. Se pòt consultar era memoria de 2013 enes installacions dera Bibliotèca de Vielha.
Es objectius entà 2015 a nivèu d’usatgèrs son: hèr conéisher es recorsi e servicis per miei de corsi de formacion; elaborar un plan de foment dera lectura entà diferenti sectors; e crear es mejans entà fomentar era participacion 2.0. En çò que tanh ara gestion: mantier es collaboracions damb associacions e entitats dera val; promòir es servicis, eth hons e es activitats a trauèrs des mejans de comunicacion; e méter a disposicion deth public tota era colleccion locau.
26/11/2014