Notícies Veir istoric
Vielha e Mijaran inaugure era Escòla de Pairs e Mairs dera Escòla Mairau “Era Cunhèra” damb ua conferéncia sus alimentacion infantila
Era ponéncia inaugurau serà impartida per Julio Basulto, destacat dietista e nutricionista, autor de libres sus eth tèma e collaborador en diuèrsi mieis.
Eth pròplèu dimèrcles dia 16, tàs 18’00h, s’amiarà a tèrme en cinema de Vielha, era conferéncia inaugurau dera Escòla de Pairs e Mairs dera Escòla Mairau Era Cunhèra, de Vielha jos eth titol “Alimentacion infantila facila e sense problèmes”. Aguesta serà impartida per Julio Basulto, reconeishut dietista e nutricionista damb grana experiéncia en mon dera alimentacion infantila. A collaborat damb entitats coma era “Agencia Española de Protección de la Salud en el Deporte”, e actuaument collabòre en programes de ràdio de RNE e dera Cadena Ser atau coma damb revistes coma “Ser padres” o “Tu bebé”.
Maria Vergés, còsso de cultura, ensenhament e accion sociau der Ajuntament de Vielha e Mijaran manifestaue que “aguest ei un projècte, eth dera Escòla de Pairs e Mairs que nèish damb era volontat d’apropar as familhes ara escòla, ath madeish temps que sajarà d’aufrir espacis de debat e formacion entà pairs e mairs, que poguen ajudar-les en sòn dia a dia”.Atau madeish higie que “cau arregraïr autant ath personau dera Escòla Mairau coma as pairs e mairs qu’an volut inscriuer-se, era sua implicacion, e fòrça especiaument ara pediatra Imma Caubet, qui a collaborat intensament entà qu’aguesta activitat siguesse ua realitat”.
Aguesta ei era prumèra des activitats d’aguesta Escòla que s’anaràn repetint mesadèrament pendent eth cors escolar. Atau madeish, segontes a informat Vergés, i aurà activitats dubèrtes a tota era ciutadania e d’autes reservades sonque as pairs e mairs inscrits ena Escòla.
Vielha, 10 de març de 2016