Notícies Veir istoric
Er Ajuntament de Vielha e Mijaran se premanís entara etapa deth Tour de França que començarà ena caplòc aranés
Era 9ª etapa deth Tour de França 2016 realizarà era sua gessuda en Vielha
Es còssos der Ajuntament de Vielha e Mijaran, Jacinto Cuny, Alberto López e Ramón González s’an amassat damb es Conselhers Anna Diaz e José Antonio Boya en Conselh Generau d’Aran entà tractar es ahèrs restacadi damb era organizacion der inici dera 9ª etapa deth Tour de França, qu’aurà lòc en Vielha eth 10 de junhsèga de 2016.
Era session de trabalh s’a enfocat principauments en organizar e premanir es requisits qu’era organizacion deth Tour a sollicitat entath desvolopament dera etapa. Un des principaus requisits que s’a tractat ei era de trobar e preparar lòcs entath parcatge de 4.000 veïculs, 40 trailers, 10 elicoptèrs e era equipa dera caravana publicitària. Cau destacar qu’aguest iuèrn er Ajuntament de Vielha ja comencèc a premanir eth parcatge de Vielha des vielhes casèrnes militars. Ath delà s’a estudiat tanben era possibilitat d’utilizar es patis deth Collègi Garona e der IES d’Aran entà albergar eth nombrós volum de veïculs q’arrivaran en aqueri dies, donques qu’era etapa anteriora a era sua fin ena vesia localitat francesa de Luchon e se demore que pendent aguesta dimenjada, era Val d’Aran e sustot Vielha, se tròben tamb un 100% d’aucupacion. Alberto López, Còsso d’Espòrts, a destacat “er impacte economic qu’aurà aguesta etapa en Vielha merite er esfòrç e trabaLh que se realize des der Ajuntament”. Eth Tour de França ei un des eveniments esportius mès importants deth Mon, e eth mès destacat en ciclisme. Se retransmet en toti es païsi deth Mon e son nombrosi es aficionadi qu’ac seguissen. Un aute des tèmes que s’a tractat ena reünion d’aué a estat desvolopar ua campanha de promocion, entre er Ajuntament e Torisme Val d’Aran, tant a nivèu locau coma toristic. Entre eri s’estúdie era possibilitat de realizar activitats cicloespòrtiues es dies avantes deth gran eveniment.
02/04/2016