Notícies Veir istoric
S’apròven es pressupòsti der Ajuntament de Vielha e Mijaran entath 2015
Damb sies vòts a favor e cinc abstencions
Eth deluns 24 de noveme, er Ajuntament de Vielha e Mijaran a celebrat un
plen en session ordinària dera corporacion, a on entre d’auti aspèctes,
s’an aprovat es pressupòsti deth consistòri de cara ar an 2015.
Ena amassada, qu’agut lòc ena sala de plens deth consistòri, s’an
aprovat es pressupòsti der Ajuntament de cara ath 2015 (6 vòts en favor e
5 abstencions) que seràn de 4.843.885,08€, çò que supause un 1,68% mens
qu’en 2014.
Cau destacar que se preve retornar eth 25% dera paga extra de Nadau de 2012 as trabalhadors deth consistòri, qu’er Estat espanhòu proïbic pagar; s’incremente era jornada des trabalhadors dera Escòla Mairau en un 10% enquia arribar ath 90%; era aportacion as entitats municipaus descentralizades (es pòbles) aumente un 10%; e s’incremente eth 16% dera partida d’inversions.
Eth baile de Vielha e Mijaran, Alex Moga, a declarat que “aguesti pressupòsti se basen en realisme, era austeritat e era prudéncia. Mantenguem era nòsta apòsta pera generacion d’aucupacion, era reactivacion economica, era promocion toristica e es politiques culturaus, esportiues, sociaus e de sostenibilitat. Tot açò gràcies a auer redusit a zèro eth deute municipau er an 2014”.
Tanben s’a aprovat ua peticion ara Confederacion Idrografica der Ebre entà demanar qu’enes accions que realizen en arriu Garona, agen en compde es zònes de Casarilh, Aubèrt e era part nauta der arriu Nere.
Entre d’auti aspèctes importants s’an repassat es Decrèts deth baile; e er informe d’intervencion d’avaloracion e compliment dera Lei 3/2004, deth tresau trimèstre de 2014 que, coma conclusion, s’a informat qu’er Ajuntament pague as provedidors a 10 dies, en tot redusir en 4 era mejana d’er an passat. Tanben s’a aprovat era revision deth Plan Bàsic d’Emergéncies Municipaus.
24/11/2014