Notícies Veir istoric
Signatures de convènis entre er Ajuntament de Vielha e Mijaran e es associacions araneses, Còlha de Santa Maria de Mijaran de Musica e Dances, Fondacion Musèu Etnologic dera Val d’Aran e Associacion de Volentaris Val d’Aran.
Es tres convènis son annaus e prorrogables.
Eth baile de Vielha, Juan Antonio Serrano, s’a amassat aué, dimèrcles 13 d’abriu, entà era signatura de tres convènis damb es representants des associacions de Vielha, Angelina Cases, coma Presidenta dera Còlha de Santa Maria de Mijaran de Musica e Dances, Rosa Maria Salgueiro, coma Presidenta dera Fondacion Musèu Etnologic dera Val d’Aran e damb Roberto Boya, President dera Associacion de Volentaris Val d’Aran. Aguestes associacions, plaçades en Vielha, an es següents objectius: Còlha de Santa Maria de Mijaran de Musica e Dances, era difusion deth patrimòni musicau e coreogràfic tradicionau d’Aran, mejançant eth sòn Grop de Dances. Fondacion Musèu Etnologic dera Vau d’Aran, promòir tota classa de manifestacions dera cultura d’Aran e dera sua lengua e conservar eth sòn patrimòni artistic e documentau. Associacion de Volentaris Val d’Aran, collaborar e participar en es activitats tant esportiues, culturaus coma sociaus que s’organizen en municipi de Vielha e Mijaran, damb era fin de poder hèr arribar ath maxim de public totes aguestes accions e sustot garantir era celebracion des madeishes, damb eth sòn supòrt.
Juan Antonio Serrano a comentat: "aué è signat es convènis damb dues associacions fonamentaus entara conservacion deth patrimòni culturau, lingüistic e musicau d’Aran e damb ua tresaua, era de Volentaris d’Aran, que damb eth sòn esfòrç e trabalh collabòren fòrça damb eth nòste municipi" . Aguesti convènis son laguens dera Ordenança Municipau reguladora de subvencions aprovades peth Plen de data 22 de deseme de 2005 e modificada per Acòrd deth Plen deth dia 26 de seteme de 2007 e per Acòrd deth Plen de seteme de 2014. Es tres convènis auràn ua vigéncia d’un an e es dues parts poderàn acordar, pendent era vigéncia deth convèni, era sua prorròga de futures annualitats
13/04/2016