Notícies Veir istoric
Eth Palai de Gèu de Vielha aufrís nauetats enta d’aguest ostiu enes sòns corsi e concentracions de natacion e patinatge
S’amplien es oraris e se redusissen es prètzi
Eth pròplèu 27 de junh eth Palai deGèu copmenzara era sason d’ostiu en tot ampliar es dies que serà daurit ath public, donques se somaran es dimenges. Er orari de dubertura serà eth madeish qu’eth des dissabtes, ei a díder, de 10.00 a 14.00 ores e de 16.30 a 20.30 ores. Pendent aguest periòde, que finalizarà eth 4 de seteme, eth Palai de Gèu aufrirà un numero similar d’activitats dirigides, encara que quauques d’eres se realizaran en exterior damb er objectiu de profitar eth bon temps. Cau destacar tanben qu’es persones que pas siguen abonades auràn era possibilitat d’acuelher-se a ua promocion especiau entà tot er ostiu. Ath delà d’aguesta aufèrta, eth Palai de Gèu tanben haran tres corsi de natacion dirigida ara poblacion infantila, e de 20.00 a 21.00 ores, s’impartirà eth de adults. Era nauetat mès destacabla d’enguan ei que se darà contunhitat as corsi de natacion entà mainatges de 2 a 3 ans que s’an desvolopat pendent er iuèrn. D’aguesta manèra, es dimars e es dijaus, de 18.00 a 19.00 ores, totes es familhes interessades en aguesta activitat poderàn practicar-la pendent tota era campanha estivau. Entàs nedadors mès experimentadi, eth Palaide Gèu a preparades tres concentracions de natacion que constaràn de tres ores cada dia, cinc dies consecutius, en tot combinar eth trabalh aquatic damb eth desvolopament d’entrenaments especiaus dehòra der aigua. Aguest programa s’impartirà era dusaua setmana de junhsèga, era darrèra d’agost e era prumèra de seteme.
Fin finau, cau destacar qu’enguan se contunharàn desvolopant es tradicionaus concentracions esportiues de patinatge artistic sus gèu, deth 4 de junhsèga ath 26 d’agost, en blòcs de cinc dies ara setmana. Damb er objectiu d’estrénher era relacion des abonadi damb eth Palai de Gèu, en aguesta ocasion s’an redusit es còsti d’aguesta activitat enta d’aguest collectiu de persones qu’actuauments se tròbe apròp des 700. Ua chifra que hège ans que pas s’artenhie en aguesta epòca der an. Tota era informacion restacada damb es oraris, inscripcions e prètzi, se pòt sollicitar ena recepcion deth Palai de Gèu de Vielha, en corrèu electronic palaidegeu@palaidegeu.com e en telefòn 973 642 864. Per auta part, s’a daurit eth termini de sollicituds entara explotacion deth bar dera pìscina exterior deth Palai de Gèu que sera duberta pendent era temporada estivau, deth 20 de junh ath 20 de seteme en orari de 11.00 a 19.00 ores. Es interesadi an tota era informacion ena pagina web www.vielha-mijaran.org e en tauler d’anoncis der Ajuntament.