Notícies Veir istoric
Er Ajuntament de Vielha e Mijaran signe un convèni de collaboracion damb era AECC-Catalunya Contra el Càncer
Eth convèni, que se formalizarà enes pròplèu setmanes, preten desvolopar activitats de divulgacion e conscienciacion sus aguesta malautia e era sua prevencion, pendent tot er an en municipi.
Aguest maitin s’a amiat a tèrme ua amassada entre er Ajuntament de Vielha e Mijaran, representat pera dusau tinent d’alcalde e còsso d’accion sociau, Maria Vergés, e representants des juntes locau e provinciau dera AECC tà barrar era signatura d’un convèni de collaboracion entre es dues parts.
Aguest acòrd contemple, ath delà collaboracion qu’er Ajuntament de Vielha e Mijaran realize annaument damb era AECC ena organizacion des colònies tà mainatges damb malauties oncologiques que se celèbren ena Val d’Aran, era programacion d’activitats periodiques en municipi de Vielha e Mijaran, atau coma era cession d’un espaci fisic a on era Junta Locau dera AECC en Aran pogue atier es consultes dera ciutadania e amiar a tèrme servicis d’atencion psicologica. Maria Vergés destacaue que “aguest convèni, de mil euros annaus, vò anar mès enlà dera pròpria aportacion economica, e sage d’apropar ar Ajuntament de Vielha e Mijaran as sòns vesins e vesies enes moments de dificultat”. E higie que “eth càncer ei ua malautia fòrça estenuda ena nòsta societat e, ath còp, tanben fòrça desconeishuda. Ei pr’amor d’açò que consideram qu’era collaboracion damb era AECC se torne tant importanta, mès se tiem en compde eth gran trabalh que realize tanben en Aran”. Era amassada s’a amiat a tèrme en Salardú, en tot coincidir damb es colònies qu’era AECC organize cada an e a on enguan participen 98 mainatges e mainades de tota Espanha. I an participat Eduardo Serrano e Mª Carme Grasa, coma representants dera Junta Provinciau dera AECC en Lleida, Eva Figuera, psicològa e gerent dera AECC en Lleida; Jordi Arjó, psicològ dera Junta Locau d’Aran e Sisco Maranges e Rosa Toló, coma representants dera Junta Locau dera AECC en Aran.
21/07/2016