Notícies Veir istoric
Alex Moga repasse es accions amiades a tèrme en projècte Sud’Eau 2
En seminari finau celebrat en Tafalla
Er Ajuntament de Vielha e Mijaran a participat aguesta setmana, dera man der alcalde, Alex Moga, en seminari finau deth projècte Sud’Eau 2 qu’agut lòc en Tafalla (Navarra), a on s’an presentat es diferentes accions qu’an realizat es sòcis actius deth projècte europèu sus era conscienciacion en consum der aigua e era sua importància en entorn naturau.
Eth dimars 4 de noveme, er alcalde de Vielha e Mijaran, Alex Moga, a participat en blòc ‘El proyecto Sud’Eau 2 en los diferentes territorios’, a on a repassat es diuèrses activitats que s’an desvolopat en cap-lòc dera Val d’Aran: “Auem hèt talhèrs entàs mès petiti e conferéncies de caractèr pedagogic e scientific entàs adults”.
“Auem parlat sus eth problèma der aigua doça en mon e realizat un estudi entà mesurar era qualitat der aigua deth Garona”, a argumentat Moga, qui a finalizat: “Volem contunhar en pròplèu projècte Sud’Eau pr’amor qu’era educacion e conscienciacion des nòsti ciutadans, per çò qu’ei er arriu, ei fòrça importanta aué en dia, e ac volem hèr dera man des nòsti vesins de França”.
Per aute costat, eth dimèrcles 5 de noveme, Lluís Camarero, assistent tecnic der Ajuntament de Vielha e Mijaran, a presentat era app ‘Eth Holet’ (Android, IOS e HTML5) e a explicat que “aguesta aplicacion consistís es sies itineraris interactius sus er auviatge naturau e aquatic dera Val d’Aran. Eth sistèma foncione damb GPS e profitam eth boom des aplicacions informatiques entà mostrar lòcs d’interès dera val”.
Camarero a ahijut que “era aplicacion daurís era pòrta ara participacion ciutadana donques permet as usatgèrs ahíger rotes, tèxte, alèrtes, fòtos o vidèos”. Ath delà a descorbit: “Era app includís articles des punts d’interès, diuèrses guides per contenguts e vidèos que mòstren eth nòste entorn naturau”.