Notícies Veir istoric
Vielha presente eth Campionat d’Espanha de Patinatge sus Gèu 2016
Er eveniment amassarà 124 patinadors en tot destacar era preséncia de Javier Fernández, Campion deth Mon e d’Euròpa
Aué s’a presentat as mejans de comunicacion en er Ajuntament de Vielha e Mijaran eth Campionat d’Espanha de Patinatge sus Gèu 2016 que se disputarà ena pista deth Palai de Gèu de Vielha deth 16 ath 18 de deseme. En er acte an estat presents Juan Antonio Serrano, baile deth municipi, Xavier Cherta, gerent dera Federacion Espanhòla d’Espòrts de Gèu e Nathalie Pardos, presidenta deth Club Espòrts de Gèu Val d’Aran, ath delà d’Alberto López, còsso d’Espòrts, Jèsus Auré, director deth Palai de Gèu e Encarna Bahamonde, secretària deth CEGVA . Eth baile de Vielha e Mijaran, Juan Antonio Serrano a daurit era presentacion "en tot arregraïr tàs dues entitats eth sòn esfòrç e confidança en eth nòste municipi entà albergar aguesta competicion de maxim nivèu nacionau" e en tot ahíger "ei ua grana satisfaccion per Vielha auer un aute gran eveniment esportiu en es nòstes installacions".
Eth campionat se celebrarà deth 16 ath 18 de deseme ena pista deth Palai de Gèu de Vielha e son inscriti cent vint patinadors de toti dus sèxes, en es categories de Novice Advanced, Junior e Senior, tant er individuau coma es dobles. Xavier Cherta, gerent dera FEDH, a declarat "ei un plaser hèr aguest campionat en Vielha, que gaudís d’un entorn magic e damb ues installacions de naut nivèu, a on probablaments se dispute eth melhor torneg nacionau enquiara data". Entre es inscriti se tròben tres aranesi, Griselda Serrallach, deth CEGVA e Tòn Cónsul e Alexandru Ilici, que hèn concurréncia peth FC Barcelona. Cau destacar era preséncia de Javier Fernández, dus còps campion deth Mon (2015 e 2016) e quate d’Euròpa (2013-2016) e segontes Nathalie Pardos, presidenta deth CEGVA, "ei eth gran referent deth campionat mès tanben ac ei des tres patinadors aranesi que haràn concurréncia en casa e demoram que poguen auer eth supòrt des sòns en es grades" ath delà a ahijut "arregraïm enòrmaments era collaboracion der Ajuntament de Vielha eMijaran e deth Palai de Gèu e dera rèsta de collaboradors".
30/11/2016