Notícies Veir istoric
Er Alcalde de Vielha e Mijaran s’amasse damb eth Conselhèr de Territòri e Sostenibilitat dera Generalitat
Eth Conselhèr de Territòri e Sostenibilitat dera Generalitat, Josep Rull, a visitat aguest maitin er Ajuntament de Vielha e Mijaran a on a estat recebut per alcalde, Juan Antonio Serrano, e era dusau Tinent d’Alcalde, Maria Vergés, e eth còsso d’infraestructures, òbres e servicis, Ramon González. Pendent era amassada mantenguda, er alcalde Serrano a hèt a arribar ath conselhèr quauques demanes sus ahèrs relacionadi damb er àmbit der urbanisme qu’actuaument son en tràmit ena Generalitat. Atau madeish, tanben a sollicitat ath conselhèr qu’era Generalitat pogue installar dus semafors ena C28, ath sòn pas per Escunhau e Casarilh. “Aguesta ei ua demana qu’es pròpris vesins mos an hèt a arribar en fòrça ocasions pr’amor deth naut risc que i a en aquera via” manifestaue Serrano, “ath delà de qu’eth Plen der Ajuntament tanben aprovèc per unanimitat hèr aguesta sollicitud”. Atau madeish, es servicis tecnics der Ajuntament de Vielha e Mijaran an exposat ath conselhèr eth besonh de trobar ua forma de collaborar entà poder realizar er estudi tecnic, e es posteriors accions de besonh, entà resòlver era actuau problematica que presente eth Barranc de Casau, entà protegir autant eth nucli urban de Casau coma tota era zòna que i limite en pòble de Vielha.
En aguesta amassada s’a hèt tanben era demana de collaboracion e supòrt dera Generalitat tà sollicitar ath Ministèri de Foment era adequacion dera carretèra N230 “Aguest ei un ahèr que mos preocupe especiaument, pr’amor dera nauta sinistralitat dera via e peth sòn pas peth miei de Vielha”, a declarat er alcalde, “auem instat ath conselhèr tà qu’era Generalitat mos ajude a hèr a arribar era nòsta preocupacion e qu’era nòsta veu pogue èster escotada”. Rull, que visite aué Aran entà inaugurar era naua planta de transferéncia ena boca nòrd deth Tunèl de Vielha, a estat acompanhat pera delegada der Alt Pirineu i Aran, Rosa Amorós, era directora des Servicis Territoriaus, Dolors Tella e eth director generau de Politiques de Montanha, Albert Alins.
15/12/2016