Notícies Veir istoric
Er Ajuntament de Vielha e Mijaran assomís era gestion deth Palai de Gèu
En tot seguir damb es tràmits iniciadi en 2015 dempús de conéisher es resultats der estudi legau e economic financèr encomanat per anterior equipa de govèrn e qu’obligauen a dissòler era societat Viella Gestión S.A pes sòns grèus problèmes financèrs, concessionària d’aguesta gestion, entà complir damb era lei Eth plen extraordinari der Ajuntament de Vielha e Mijaran a aprovat aué, damb era abstencion deth grup de Convergéncia e es vòts a favor deth grup d’Unitat d’Aran, era recuperacion dera concession de VIGESA, responsabla dera gestion deth Palai de Gèu de 1994 ençà, darrèr procès tà culminar damb era sua dissolucion e complir atau damb eth mandat legau. Pendent es darrèri mesi s’an amiat a tèrme nombrosi e complèxes tràmits administratius entà poder dar compliment a çò que mèrque era lei pr’amor des grèus problèmes financèrs que presentaue VIGESA, e dissòler-la definitivament. A trauès d’aguesti tràmits er Ajuntament de Vielha e Mijaran assomís era gestion complèrta der equipament deth Palai de Gèu a compdar der un de gèr de 2017.
Juan Antonio Serrano declaraue que “volem transméter a toti es vesins e usatgèrs d’aguest equipament eth nòste compromís damb eth servici qu’eth Palai de Gèu prèste e qu’amiam a tèrme un gran esfòrç entà que se pogue seguir prestant”. Ara ei previst qu’enes pròplèu mesi se daurisque a concors public era gestion deth Palai as empreses privades interessades. “En cas que i age quauqua empresa interessada, er Ajuntament deisharie de gestionar dirèctament eth Palai, çò que supausarie ua descarga economica importanta tàs arques municipaus” manifestaue Serrano e higie que “trabalham intensament tà redreçar ua situacion que hè massa ans que s’arrossègue, fòrça complèxa e perjudiciau tar Ajuntament e tath municipi, mès èm optimistes e demoram que se pogue resòler dera melhor forma tà toti”.