Notícies Veir istoric
Vielha se premanís entà celebrar era Hèsta de Magràs
Er Ajuntament de Vielha e Mijaran aufrís ua actuacion entath public familhar eth dissabte 25 e era collaboracion damb era Escòla Garona e er AMPA atau coma era Escòla Mairau
Es pròplèus dies 24 e 25 d’hereuèr se celebrarà en Vielha era tradicionau e participatitua Hèsta de Magràs damb activitats familhares.
Eth diuendres 24, a compdar des 10.00 ores, coma cadan es alumnes dera Escòla Garona organizen eth tradicionau passavila per Vielha. Enguan, coma er an passat, tanben i participarà era escòla mairau "Era Cunhèra", e er Ajuntament de Vielha e Mijaran collaborarà damb aguesta activitat aufrint un espectacle infantil dera companhia "Sac Espectacles".
En arrivar ena plaça dera Glèisa de Vielha, cremaràn eth pipòt de Magràs e gaudiràn d’un esdejoar aufrit per AMPA dera Escòla Garona.
Eth dia 25 d’hereuèr, tàs 18.00 ores, en Palai d’Espòrts de Vielha, er airau de cultura der Ajuntament torne a organizar ua hèsta de Disfrassi damb un espectacle entà tota era familha, gratuït, a cargue dera companhia "Corrandes d’Animació".
Ath delà, en marc des activitats dera setmana de Magràs, era Bibliotèca Generau de Vielha, aufrís tanben un talhèr gratuït de Caretes tà mainatges e mainades a compdar de 8 ans, eth pròplèu 14 d’hereuèr tàs 17.30 ores. Es places son limitades.
Entà Maria Vergés, còsso de Cultura, Educacion e Accion Sociau der Ajuntament de Vielha e Mijaran "des deth Consistòri contunham trabalhant entà poder aufrir disparières activitats culturaus , en tot profitar es hèstes tradicionaus" e tanben "en aguest sentit, collaboram fòrça damb era Escòla Garona entà coordinar accions e, ath madeish temps, entà includir ara nòsta escòla mairau en totes aguestes activitats"