Notícies Veir istoric
Era Escòla Mairau “Era Cunhèra” organize ua charrada sus eth lenguatge en mainadèra de 0 a 3 ans
Laguens des activitats dera Escòla de Pairs e Mairs deth centre depenent der Ajuntament de Vielha e Mijaran que serà impartida per professionaus deth CDIAP (Centre de Desvolopament Infantil e Atencion Precòç)
Eth pròplèu 7 de març, tas 18’00h, ena sala “Era Audiovisuau” de Vielha era Escòla Mairau “Era Cunhèra”, depenenta der Ajuntament de Vielha e Mijaran, organize era charrada que, jos eth titol “Desvolopament e estimulacion deth lenguatge en mainatges/des de 0 a 3 ans”, ei adreçada as familhes damb hilhs en aguestes edats.
Era conferéncia, que serà impartida pes professionaus deth CDIAP (Aran Salut), preten abordar ahèrs relacionadi damb eth desvolopament e evolucion dera parla e es pautes entà estimular-la, atau coma dotar as pairs e mairs de recorsi entà qu’ajuden a afavorir un corrècte desvolopament deth lenguatge ena mainadèra.
Segontes explicaue Maria Vergés, còsso de cultura e ensenhament der Ajuntament de Vielha e Mijaran, “se tracte d’ua activitat qu’ei enmercada ena Escòla de Pairs de Mairs dera nòsta Escòla Mairau e que vò facilitar recorsi as familhes entà ajudar-les ena educacion des sòns hilhs”. Atau madeish “volem impulsar ath long deth cors escolar d’autes accions qu’impliquen as familhes en dia a dia dera Escòla Mairau” higie Vergés.
Era charrada ei dubèrta e gratuïta entà toti es publics
27/02/2017