Notícies Veir istoric
Vielha acuelherà eth Campionat de Catalonha de Patinatge Artístic sus gèu
Aguesta dimenjada se celèbre, ena Pista deth Palai de Gèu, eth Campionat de Catalonha e era Ia Copa Vielha damb 123 participaires
Aué s’a presentat ena Sala de Plens der Ajuntament de Vielha e Mijaran eth Campionat de Catalonha e era Ia Copa Vielha de Patinatge Artistic sus gèu a on se daràn cita 123 patinadors de totes es federacions autonomiques d’Espanha.
En acte de presentacion an estat Juan Antonio Serrano, baile de Vielha e Mijaran, Jesús Auré, director deth Palai de Gèu e era representacion deth club organizador der eveniment, CEGVA, Nathalie Pardos, presidenta e Encarna Bahamondes, secretària.
Eth Campionat se celebrarà aguesta dimenjada, der 11 e 12 de març, enes installacions deth Palai de Gèu de Vielha damb era preséncia des melhors patinadors nacionaus de totes es categories e qu’an superat es pròves dera Federacion de Patinatge Artistic.
Entà Juan Antonio Serrano "ei un plaser poder collaborar des der Ajuntament damb aguestes iniciatiues que dan nòm a Vielha en tot potenciar eth torisme en nòste municipi" en tot ahíger ath delà que "damb aguest campionat e eth Campionat d’Espanha de deseme se reauce eth potenciau dera pista de gèu deth Palai de Gèu de Vielha".
Nathalie Pardos, directora deth club organizador CEGVA declaraue "ei un aunor qu’era Federacion torne a compdar damb nosati entara organizacion d’un campionat tan important e açò ei mòstra dera grana installacion qu’auem e deth trionf artenhut dempús de acuelhèr eth Campionat Nacionau" e "m’agradarie arregraïr ar Ajuntament de Vielha e Mijaran era sua collaboracion e participacion enes eveniments qu’organizam, donques qu’èm des pòqui clubs qu’auem ara nòsta plea disposicion era installacion municipau entà realizar-les".
Eth club CEGVA compdarà damb dètz participaires en eth Campionat en diferentes categories que cercaràn pujar en çò mès naut deth pòdium.
Jesús Auré, director deth Palai de Gèu a volut ahíger "qu’aguesta ei ua naua oportunitat entà demostrar eth potenciau qu’an es installacions municipaus, tant ena organizacion, eth materiau disponible coma eth personau que i trabalhen"