Notícies Veir istoric
Vielha aurà un centre tara joenessa a finaus d’an
Era modificacion de crèdit aprovada en passat plen der Ajuntament permeterà invertir 30.000€, tà realizar es òbres d’adequacion der antic aucider, a on se plaçarà eth centre qu’acuelherà activitats entà mainatges e joeni de 10 a 15 ans.
Aguest espaci aurà coma objectiu organizar, a trauès de personau titolat, tot tipe d’activitats ludiques, formatives, esportives, artistiques, e de temps liure en generau, que permeten afavorir eth creishement e desvolopament integrau des joeni qu’i participen.
“Damb aguest centre volem tanben aufrir un espaci a on es nòsti joeni se poguen amassar dempús des classes en un ambient controtlat e positiu” explicaue Alberto López, còsso de joenessa e espòrts der Ajuntament de Vielha e Mijaran.
Era prevision ei qu’enguan se realize ua prumèra fasa ena que s’abilite era planta baisha der edifici, en tot dotar-la de banhs e calefaccion, e mès entà deuant se pogue abilitar era dusaua planta.
“Era creacion d’un centre tàs nòsti joeni siguec un des compromisi que prenerem pendent era campanha electorau e èm fòrça satisfèti de poder-lo amiar a tèrme” manifestaue Juan Antonio Serrano, alcalde de Vielha e Mijaran.
Es òbres s’iniciaran enes pròplèu setmanes entà méter en foncionament eth centre a finaus d’an.
27/03/2017