Notícies Veir istoric
Signatura des convènis de collaboracion damb entitats culturaus
Dera man deth baile Alex Moga ena sala de Plens
Eth dijaus 4 de deseme, er Ajuntament de Vielha e Mijaran, dera man deth sòn baile, Alex Moga, a signat es convènis de collaboracion damb quate entitats culturaus deth municipi entà seguir en tot apostar per auviatge culturau pròpi dera Val d’Aran.
Dues des associacions culturaus son es còlhes de dança aranesa ‘Es Fradins de Vielha’ e ‘Còlha Santa Maria de Mijaran’. Eth consistòri deth cap-lòc dera Val d’Aran apòrte 2.000 èuros a cada entitat entara sua activitat ordinària de 2014. Es balhs aranesi son fòrça presents e viui ena societat de Vielha e dera val.
Un aute convèni ei damb era Fundació Museu Etnologic dera Val d’Aran entà sostier economicaments es activitats de 2014 deth collectiu Lengua Viua damb 600 èuros. Entre d’autes accions, Lengua Viua ei er organizador de ‘Aran per sa lengua’, era tradicionau hèsta pera lengua aranesa.
Eth darrèr acòrd ei damb era Escòla de Musica Val d’Aran. Er Ajuntament de Vielha e Mijaran apòrte 3.500 èuros entà ajudar as activitats de 2014 dera entitat, que realize formacion e concèrts entà/damb tot tipe d’estruments musicaus.
Eth baile de Vielha e Mijaran, Alex Moga, a explicat que “contunham en tot potenciar Vielha coma destinacion culturau e apostam per associacionisme culturau deth nòste municipi. Ath delà, enes pròplèus dies presentaram eth programa Vielha Cultura 2014/16”.