Notícies Veir istoric
Vielha compde des d’aguest mes d’abriu damb tres espacis cardioprotegidi
Er Ajuntament de Vielha e Mijaran a installat espacis cardioprotegidi en Palai de Gèu, en Palai d’Espòrts e en Casau deth Jubilat damb desfibrilladors DEA de facil accès que permeteràn garantir era assisténcia sanitària
Aguest mes d’abriu er Ajuntament de Vielha e Mijaran a abilitat espacis cardioprotegidi en Palai de Gèu, en Casau de Jubilat de Sant Miquèu e en Palai d’Espòrts, tà qu’a compdar d’ara, tant personau sanitari coma personau autorizat, poguen hèr usatge des desfibrilladors DEA deuant d’emergéncies medicaus enes quaus eth temps de reaccion ei vitau quan se patís ua arturada cardiaca.
Damb aguesta accion er equip de govèrn preten qu’era ciutadania e usatgèrs des installacions municipaus poguen auer a disposicion un estrument que pòt sauvar vides. Enes pròplèus setmanes se realizaràn corsi de formacion e reciclatge a tot eth personau tecnic esportiu der Ajuntament atau coma as responsables e coordinadors des activitats que s’amien a tèrme en Palai d’Espòrts e en Casau deth Jubilat. Er objectiu principau ei ampliar ath maxim eth numerò de persones autorizades que poguen hèr un corrècte usatge des desfibrilladors.
Es espacis cardioprotegidi son ubicacions especifiques a on s’installe un desfibrillador extèrn semiautomatic de facil accès, deth quau eth personau autorizat pòt hèr usatge en cas d’emergéncia çò mès lèu possible, damb era garantida deth sòn corrècte foncionament e estat de manteniment e en tot generar atau ua major seguretat entre es usatgèrs des installacions.
Juan Antonio Serrano, alcalde de Vielha e Mijaran, declaraue "contunham trabalhant tàs nòsti vesins e tàs usatgèrs des nòstes installacions municipaus, tant esportiues coma associatiues, en tot aufrir-les espacis segurs enes quaus en cas d’emergéncia pogam actuar çò mès lèu possible".
20/04/2017