Notícies Veir istoric
Telefónica implemente era fibra optica en pòble de Vielha pendent aguest ostiu.
Er Ajuntament de Vielha aprovèc eth 11 d’abriu passat per Conselh de Govèrn Locau eth plan de desplegament dera fibra optica ara poblacion de Vielha entà somar-se ath procès de transformacion digitau.
Telefónica a iniciat dejà es trabalhs de desplegament dera fibra optica qu’era companhia presentèc en Ajuntament de Vielha e Mijaran eth passat 30 de març. Eth Plan d’implantacion dera fibra optica, tanben nomentada FTTH, se realizarà en diuèrses fases e anualitats entà acabar dant cobertura a tot eth municipi. Es trabalhs realizadi er aguesta prumèra fasa consistissen en adaptar era centraleta telefonica de Vielha e crear eth hilat d’alimentacion que permeterà distribuïr era fibra optica a trauès d’un nau cablejat.
Eth projècte de fibra optica arribe en nòste municipi dempús qu’eth passat 4 de mai de 2016 eth còsso de Naues Tecnologies, Alberto López, s’amassèsse damb es responsables dera enterpresa en Barcelona entà reclamar era fibra optica entath municipi atau coma entà conéisher de prumèra man er estat de implementacion. Segontes López "Era implantacion dera fibra optica se convertirà en motor dera emprenedoria, donques ajudarà a méter en marcha nombrosi projèctes d’innovacion, atau coma a generar naues oportunitats laboraus qu’enquiara non èren possibles. Ath delà, era fibra optica ei estretament estacada ath benéster economic, sociau e toristic."
Es principaus avantatges tecniques dera fibra optica son: era grana velocitat, capacitat, qualitat e maximala seguretat ena transmission de dades. Un clar exemple ei qu’es ciutadans passaràn de navegar de 6Mb a superar es 300Mb e perceberàn ua melhora en servici d’internet mòbil 4G que se veirà beneficiat pera fibra optica en tot aumentar considerablaments era velocitat en tot superar es 40Mb, en tot èster ua alternatiua entàs larèrs e empreses que peth moment non poderàn gaudir deth servici FTTH.
Entà realizar era implantacion dera fibra ei de besonh hèr un nau desplegament de cablejat tant aerian coma soterrat per totes es vies urbanes des pòbles de Vielha e Mijaran. Se profitaràn totes es canalizacions existentes tà passar eth nau cable des dera centraleta principau tà anar pòc a pòc en tot hèr-la extensible ara rèsta de pòbles.