Notícies Veir istoric
Eth Trail Vielha – Molières 3010 a un impacte economic de mès de 300.000€ en municipi.
Pendent era dimenjada Vielha pengèc eth pannèu de complèt entà acuélher ua des carrères de montanha mès importanta deth nòste territòri damb 700 participaires e apròp de 2000 acompanhaires.
Dissabte passat 15 de junhsèga Vielha acuelhec era prumèra edicion deth Trail Vielha-Molierès. Era carrèra de montanha compdaue damb dues modalitats, ua mieja maraton de 21km e 1500m de desnivèu e ua maraton de 40km damb 4.000m de desnivèu, que s’a convertit en ua des carrères mès exigentes des Pirenèus.
Eth catalan Nil Bacardit siguec eth campion absolut dera maraton damb un temps de 6 ores e 25 menutes e en hemnes, Marta Riba damb un temps de 7 ores 36 menutes. E era mieja maraton siguec coronada peth madrilenc Antonio Alcalde damb un temps de 2 ores e 6 menutes. Gemma Arenas, siguec era guanhadora des hemnes damb un temps de 2 ores 48 menutes.
Es païsatges dera Val d’Aran, ath costat dera impecabla organizacion e eth bon desvolopament dera pròva, heren qu’es 700 participaires acabessen era carrèra damb un ambient immillorable e damb totes es comoditats entà ua excellenta recuperacion.
Pendent tot eth recorregut, eth Trail Vielha-Molières compdaue damb diuèrsi punts de supòrt. Era carrèra compdaue tanben damb era collaboracion des Volentaris d’Aran, que se trobauen en diuèrsi punts deth circuit entà controtlar es passi des corredors entre auti prètzhèts. Era seguretat der eveniment s’amièc a tèrme gràcies as Pompièrs e as Mossos d’esquadra.
Pròves coma aguesta, ath delà de plaçar en Vielha coma un municipi perfècte entad acuèlh d’aguesti eveniments, tanben an un impacte toristic e economic fòrça notable en territòri. Pendent tota era dimenjada e es dies anteriors ara realizacion dera pròva, es establiments de Vielha e Mijaran se trobèren quasi ath cent per cent d’aucupacion. Ath delà, gràcies as granes campanhes de publicitat de mèrques coma Dynafit e es mejans especializadi coma revistes de trail running, an plaçat ara Val d’Aran coma eth lòc idonèu entà vier a practicar aguesti espòrts.
Des der Ajuntament de Vielha e Mijaran, volem destacar er impacte locau e sociau qu’a agut aguesta competicion. Era organizacion dera pròva a estat entièraments locau, atau coma es volontaris que s’an bolcat en eveniment. E cau destacar era participacion diuèrsa aranesi ena pròva. Hèts que demòstren era fòrça qu’a era nòsta comunitat e eth nòste territòri entà acuélher eveniments d’aguesta magnitud. En Vielha èm es que convidam a shautar des nòstes montanhes, e s’a demostrat fermament.
Juan Antonio Serrano, baile de Vielha e Mijaran explique que “gràcies ar acuèlh deth Trail Vielha-Molières, eth municipi se tròbe laguens deth calendari europèu de competicions de montanha. Gràcies ath nòste entorn incomparable, des der Ajuntament de Vielha e Mijaran volem plaçar Vielha coma un lòc perfècte entad acuèlh de quinsevolh eveniment esportiu.” Ath delà, eth baile remèrque que “aguesti eveniments supausen un gran impacte economic en Vielha, donques qu’era visita de toristes ena zòna hec qu’es establiments de Vielha coma otèls, botigues, bars e restaurants se trobèssen ath màxim d’aucupacion. Mos cau contunhar de trabalhar er aguesta linha entà plaçar Vielha e Mijaran coma un cap-lòc de referéncia entad acuèlh d’eveniments d’aguesta índole.
Tanben m’agradarie arregraïr a toti es ciutadans que s’an bolcat er era realizacion d’aguest eveniment, pr’amor qu’entre toti hem Vielha, pr’amor que Vielha ei de toti”.
17/07/2017