Notícies Veir istoric
Era plaça dera Glèisa de Vielha se convertirà en centre dera cultura aranesa damb era Corsa Aran Per Sa Lengua.
Er Ajuntament de Vielha e Mijaran se prepare entà acuélher aguest dimenge 30 de junhsèga era celebracion dera 24 edicion dera caminada popular Aran Per Sa Lengua.
Dimenge que ven 30 de junhsèga se celèbre era 24ª edicion dera Corsa Aran Per Sa Lengua ena plaça dera glèisa de Vielha.
Era
Corsa Aran Per Sa Lengua ei ua caminada populara organizada peth
collectiu Lengua Viua dempús der an 1993 e se tròbe jos eth lèma “Qui
ten era lengua, ten era clau”. Aguest collectiu a coma principau
objectiu era defensa der aranés coma lengua e sage mantier era cultura e
es tradicions araneses a trauès d’eveniments sociaus e culturaus.
Era
caminada ges des de tres punts diferenti de la Val d’Aran: Les,
Montgarri e eth Pòrt de Vielha, enquia que s’amassen en Vielha sus es
20ores. Un còp se tròben ena plaça dera glèisa de Vielha, eth collectiu
Lengua Viua realize eth liurament un prèmi ara persona o institucion que
pendent aguest darrèr an a destacat damb es sues accions ena defensa e
promocion der usatge der aranés. Un còp liurat es prèmis, era hèsta se
barre damb era accion d’un grop musicau de cançons tradicionaus
occitanes e araneses.
Er orari aproximat dera caminada ei eth següent:
– Gessuda liura des deth Pòrt de Vielha
– 12,00h Gessuda des de Les
– 12,00h Gessuda de Montgarri
– 12,50h Parada en Bossòst, plaça dera glèisa
– 14,30h Gessuda des de Tredos
– 15,00h Es Bòrdes, minjar toti amassa (morralet pròpri)
– 15,00h Unha, minjar toti amassa (morralet pròpri)
– 17,00h Gessuda des des Bòrdes
– 17,00h Gessuda des de Unha
– 17,00h Gessuda des de Montgarri (en tot córrer)
– 18,30h Gessuda des d’Arties, plaça Urtau
– 20,15h Arribada ena plaça dera glèisa
– 20,30h Concèrt
Juan
Antonio Serrano, baile de Vielha e Mijaran soslinhe que “era corsa
d’Aran Per Sa Lengua a fòrça significat entàs abitants d’Aran. Se tracte
deth major punt d’amassada e reünion de toti es abitants dera Val
d’Aran sense excepcion e deth major festeig dera nòsta lengua e
tradicion. Gràcies ara iniciatiua d’Aran Per Sa Lengua, aguesta hèsta
s’a assolidat coma er eveniment der estiu entà toti es aranesi e
araneses.” Serrano tanben ahig que “tanben ei ua bona atraccion entad
aqueri toristes que mos visiten donques que des dera plaça dera glèisa
de Vielha poderàn conéisher es tradicions culturaus de la Val d’ Aran”.