Notícies Veir istoric
Era exposicion Era Pagesia en Aran a mès de 40 visitants ath dia pendent era prumèra setmana.
Era sala d’Exposicions de Vielha se convertís en lòc a on conéisher era evolucion dera istòria des pagesi dera Val d’Aran.
Era exposicion “Era Pagesia en Aran” realizada pera Fondacion deth Musèu Etnologic dera Val d’Aran, s’inaugurèc eth passat 31 de junhsèga ena Sala d’Exposicions de Vielha. Pendent era prumèra setmana, era exposicion a arrecebut ua mejana de 40 visitants ath dia, tant d’abitants dera Val d’Aran coma de toristes.
“Era Pagesia en Aran” se tracte d’ua exposicion que recor era istòria dera evolucion dera Val d’Aran dempús des ans 30. Ena exposicion, podem veir coma era Val d’Aran passèc d’èster ua tèrra que se sustentaue gràcies ath bestiar e es cultius, a un lòc de referéncia toristica en nòste país.
Ena exposicion tanben arreconeishem es cambiaments morfologics deth territòri aranés. Enquià hè 50 ans, es prats s’estenien per tota era val, un païsatge irrecognoscible aué en dia.
Es abitants dera Val d’Aran se sustentauen gràcies ath bestiar, que mostrauen enes hèires e es ajudes e subvencions der estat. Era sua principau hònt de neuritud èren es sòns pròpris cultius que se basauen ena truha e es cereals. Ath delà, ena exposicion trobam estruments tipics dera epòca e fòrça autes peculiaritats deth cultiu que se realizaue.
Era majoria des fotografies dera exposicion an estat cedides per vesins de toti es pòbles dera Val d’Aran. Gracies as vesins e ath gran trabalh dera Fondacion deth Musèu Etnologic dera Val d’Aran, aué en 2018 podem veir guaire a cambiat eth nòste territòri e es nòstes costums.
Er orari dera exposicion ei de 19 ores a 21 ores e se realizarà enquiath pròplèu 31 d’agost. Des der Ajuntament de Vielha e Mijaran volem convidar a toti a conéisher era evolucion dera istòria dera Val d’Aran.
07/08/2017