Notícies Veir istoric
Eth Nòste Mercat torne a installar-se ena plaça dera glèisa de Vielha eth 27 d’agost.
Er objectiu deth mercat ei promòir era autosostenibilitat e era solidaritat entre toti es vesins des pòbles.
Eth pròplèu 27 d’agost, se realize era dusau edicion de Eth Nòste Mercat. Se tracte d’un mercat de dusau man dirigit a particulars que volguen dar gessuda a productes usadi que se tròben en bon estat. Eth principau objectiu d’aguest mercat de dusau man ei promòir era autosostenibilitat e era solidaritat entre toti es vesins de Vielha e Mijaran e tanben dera rèsta deth territòri.
Es organizadores d’aguest eveniment, Montse Palá e Laura Casasayas, declaren que “entà potenciar eth succès der eveniment, ei de besonh ua excellenta comunicacion e etica entre es participaires e clients”. Per açò soslinhen qu’er eveniment aurà coma valors principaus era aunestetat sus eth prètz e er estat deth producte, era higiene e estetica tant des productes coma des lòcs, era originalitat entà èster un bon reclam, atau coma era puntualitat des assistents entà un excellent montatge e desvolopament der eveniment.
Ath delà des valors principaus, er eveniment exigís ua sèria de condicions e requisits coma son: era venta exclusiva d’articles de dusau man, era obligacion d’èster present pendent tot er orari de realizacion deth mercat, cada participaire li calerà portar damb se toti es materiaus de besonh entà montar eth sòn lòc e un còp acabat eth mercat auràn de deishar eth sòn lòc aucupat enes madeishes condicions iniciaus. Era organizacion tanben soslinhe que non se hè responsabla dera perduda o panatòri d’objèctes personaus e que non se permet era venta de productes cosmètics ne méter es productes ena tèrra.
Des der Ajuntament de Vielha, collaboram damb Eth Nòste Mercat en tot facilitar-les er usatge dera plaça dera glèisa atau coma de materiau entara realizacion deth mercat.
Juan Antonio Serrano, baile de Vielha e Mijaran soslinhe que “gràcies eth succès dera passada edicion, enguan se pòt tornar a realizar Eth Nòste Mercat. Aguest tipe d’eveniments fomenten era solidaritat e genèren comunitat damb toti es vesins e participaires deth territòri donques que se tracte d’un eveniment col·laboratiu.”
Entà participar o auer mès informacion podetz contactar dirèctaments damb es organizadores: Montse Palá 669 69 5140 o Laura Casasayas 688 90 4670