Notícies Veir istoric
Arribe era Hèsta Major de Vielha deth 7 ath 11 de seteme
Grana aufèrta d’actiuetats entà toti, autant grani coma petiti, e repartides pes diuèrsi carrèrs deth pòble.
Des der Ajuntament de Vielha e Mijaran amassa damb era Comission de Hèstes, premanim dejà era Hèsta Major de Vielha 2017 que coma tostemp serà deth 7 ar 11 de seteme.
Enguan e talament coma aguesti dus ans en darrèr, era entrada tàs sessions de balh contunharà estant de franc e eth prètz des lòtges serà eth madeish, 60 €. Toti aqueri que sigatz interessadi en aquerire un podetz víer entar Ajuntament enquiath dia 4 de seteme en orari de 9 a 14 ores, en tot rebrembar-vos que toti es vesins qu’er an passat auéren lòtja, enguan se les reservarà era madeisha enquiath dia 2 de seteme.
Eth programa d’actes d’enguan, premanit pera Comission de Hèstes, ei plen d’actiuetats entà toti, autant grani coma petiti, e repartides pes diuèrsi carrèrs deth pòble. Es dies abantes: 4, 5 e 6 s’organizaràn actiuetats entà que toti pogam començar a “cauar motors” : jòcs ena piscina e pista de gèu deth Palai, campionats de frotón, de volei, de tènnis taula, de bàsket, de fotbolín, cinèma ara fresca, màgia e fòrça mès.
E arribat eth dia 7, començarà era Hèsta de vertat, damb era Coronacion dera Reina e Dames des Hèstes, e era Net de Penhes, enguan organizada pera Penha “20 de copas”, sense desbrembar era Net Tematica deth dia 9 enguan damb eth tèma “Açò va de Musica”, eth Dinar Popular deth dia 10 ena Plaça dera Glèisa, tath que poderatz comprar es tiquets en Ajuntament o ena Oficina de Torisme, a un prètz de 10 €, es balhs de tarde e de net damb orquèstres e grops coma : The Golden Saxo, Europa, Galatea, Junior’s, Moonlight, La Petita Havana, Magnum Quartz, Milenium, sardanes damb era Cobla Triunfal d’Igualada …
Era Hèsta ei un bon motiu entà qu’amassa passem moments d’alegria, damb era familha, es amics e es vesins. Gaudir d’uns dies de felicitat e afrairament, deishant de costat es incomoditats deth dia a dia, entà qu’aguesta Hèsta sigue era Hèsta de toti e entà toti.
Nosati des der Ajuntament de Vielha e Mijaran atau vos ac desiram, e vos animam a que participetz des actiuetats e de toti es actes autant es grani coma es mès petiti dera casa. Per part nòsta e sustot dera Comission de Hèstes non mancaràn es esfòrci entà qu’ath pogatz hèr.