Notícies Veir istoric
Vielha e Mijaran arreceberà 800 motociclistes damb era 6ª edicion dera RodiBook.
Es establiments deth municipi tornaràn a penjar eth pannèu de complèt gràcies ar eveniment de mototurisme damb gessuda e arribada des de Vielha.
Vielha e Mijaran acuelh un aute an mès era siesau edicion deth RodiBook. Se tracte d’un eveniment motociclista non competitiu per carretères dubèrtes ath trafic en Pirenèu catalan e francés. Er itinerari ei surpresa e càmbie segontes era edicion. Eth participaire ac descorbís damb era unica ajuda d’un libre de rota, eth roadbook, en tot auer de passar pes punts prèviaments mercadi. Aguesta cita de corbes e kilometratge s’amiarà a tèrme es dies 1 e 2 de seteme en cap-lòc dera Val d’Aran.
Aguesta siesau edicion deth RodiBook compdarà damb 800 participaires que gaudiràn pendent tota era dimenjada de toti es servicis qu’aufrís eth cap-lòc dera Val d’Aran. Gràcies ara organizacion d’aguest eveniment, es establiments de Vielha acabaràn er ostiu damb ua dimenjada de maximala aucupacion gràcies ara arribada des participaires dera RodiBook, atau coma es sòns respectius acompanhaires e era organizacion der eveniment.
Juan Antonio Serrano, baile der Ajuntament de Vielha e Mijaran, soslinhe que “eveniments coma eth RodiBook se tornen imprescindibles en Vielha. D’ua banda, gràcies ad aguest eveniment, Vielha poderà penjar eth pannèu de complèt ena majoria des sòns establiments otelèrs e de servicis. Per aute costat, gràcies ar acuèlh d’eveniments d’aguest tipe, contunham plaçant Vielha coma un lòc de referéncia entara realizacion de quinsevolh tipe d’eveniment.” Ath delà, Serrano declare que “era RodiBook serà eth darrèr gran eveniment d’aguest ostiu abantes des hèstes majors de Vielha, per açò des der ajuntament de Vielha vos convidam a toti e totes a veir aguest gran espectacle que demorarà aguest pròplèu diuendres dia 1 de seteme e s’alongarà enquiath dimenge 3”.