Notícies Veir istoric
Eth Palai de Gèu de Vielha acuelherà diuèrses competicions de curling pendent era tardor e iuèrn.
Eth Club Curling Val d’Aran convertís en Vielha e Mijaran en un lòc de referéncia entara realizacion d’eveniments esportius a nivèu estatau.
Aguest maitin s’a realizat era presentacion deth Club Curling Val d’Aran ena sala de plens der Ajuntament de Vielha e Mijaran. Era presentacion s’a realizat cargue des principaus integrants deth club, atau coma peth baile Juan Antonio Serrano, eth còsso d’espòrts Alberto López, eth director deth Palai de Gèu Jesus Auré e eth president dera Federacion Catalana d’Espòrts d’Iuèrn, Óscar Cruz.
Pendent era presentacion, s’a parlat sus era auge deth curling ena Val d’Aran atau coma ena rèsta deth territòri espanhòu coma un pilar fonamentau entàs espòrts de gèu. Tanben s’an presentat es tres competicions que se realizaràn en Vielha e Mijaran pendent era tardor e era rèsta der iuèrn. Coma novetat, eth Club Curling Val d’Aran realizarà un Bonspiel de 24 ores deth 29 de seteme ath 1 d’octobre enes installacions deth Palai de Gèu. Aguest torneg se presente coma un eveniment a destacar laguens deth calendari de curling espanhòu donques qu’ei eth prumèr còp que se realize un torneg d’aguest tipe. Tanben s’an presentat d’autes dates de competicions: deth 28 e 29 d’octobre se realizarà era prumèra jornada dera Liga Catalana e deth 2 ath 4 de hereuèr deth pròplèu an 2018, se celebrarà Campionat d’Espanha de dusau division masculina.
Des der Ajuntament de Vielha e Mijaran apuam ath club de Curling Val d’Aran, tant pes sòns trionfs laguens des competicions estataus, coma pera obtencion de naues competicions laguens de Vielha. Gràcies a eri, Vielha e Mijaran se place coma un referent esportiu e eth Palai de Gèu, se convertís er ua installacion de referéncia laguens deth circuit espanhòu d’espòrts sus gèu.
Juan Antonio Serrano, baile Vielha e Mijaran a declarat que “des der Ajuntament de Vileha e Mijaran ath costat dera rèsta de federacions e institucions, volem potenciar eth curling entre es mès joeni dera Val d’Aran, entà seguir en tot assolidar aguest espòrt en nòste territòri.” Serrano soslinhe que “ath delà, gràcies ad aguest tipe de competicions, Vielha e Mijaran s’assolide coma un territòri de referéncia laguens des espòrts de gèu”
04/09/2017