Notícies Veir istoric
Excellent avaloracion des familhes ara gestion dera Escòla Mairau Municipau “Era Cunhèra”
Es resultats dera enquèsta de satisfaccion hèta pendent es passades setmanes a dat coma resultat ua nauta avaloracion des pairs e mairs ath foncionament d’aguest centre der Ajuntament de Vielha e Mijaran
Es passades setmanes era Escòla Mairau “Era Cunhèra” a amiat a tèrme es enquèstes annaus as familhes usatgères deth centre entà conéisher era sua opinion sus es diuèrsi encastres que contemple aguesta escòla.
Es resultats d’aguestes enquèstes an mostrat un naut nivèu de satisfaccion per part des pairs e mairs deth centre, coma “ben” o “fòrça ben” àmbits coma es installacions deth centre, eth personau o eth servici de minjador. Atau donc, aguesti airaus an recebut mès deth 80% de puntuacions positives deth totau de trenta sèt enquèstes realizades.
Tà Maria Vergés, còsso d’ensenhament der Ajuntament de Vielha e Mijaran “aguesti resultats son un motiu de satisfaccion tath nòste Ajuntament e tà tot eth professorat e personau dera Escòla que trabalhe intensament entà qu’es escolans e es sues familhes se senten comòdes e orgulhosi dera sua escòla”.
Aguest cors 2017-2018 era Escòla Mairau “Era Cunhèra” a començat es classes damb eth totau des places disponibles cubèrtes. “Aguest ei tanben un bon indicador de que, a despièch des dificultats, era nòsta Escòla Mairau camine ena direccion corrècta” higie Vergés.