Notícies Veir istoric
Vielha e Mijaran invertís 20.000€ enes parcs infantils dera poblacion
Pendent er an 2017 er Ajuntament de Vielha e Mijaran a realizat diferentes accions entà melhorar e apraiar es parcs infantils des carrèrs Montcorbision, Arnals e Plaça dera Glèisa damb ua inversion de 20.000€.
A inicis d’enguan 2017, er Ajuntament de Vielha e Mijaran se comprometec a realizar diferenti trabalhs de mantenement e arranjament des parcs infantils que se tròben en Vielha damb er objectiu d’auer es principaus parcs dera poblacion en perfècte estat abans dera fin der an. Era deterioracion des installacions ja ère fòrça visible, e ère de besonh ua intervencion urgenta que garantisque ues bones installacions entàs mès petiti e damb totau seguretat.
Cau destacar er important cambi realizat en parc infantil dera Escòla d’Adults, damb era substitucion deth paviment de seguretat, per un continu e de colors. Ath delà ,tanben pendent aguest estiu s’a realizat eth poliment e repintat de toti es elements de husta des tres parcs infantils.
Es accions que s’acaben d’amiar a tèrme son era substitucion deth paviment de seguretat des parcs infantils dera glèisa e deth costat der Espitau, atau coma era substitucion des elements deteriorats des parcs, coma tets e balançaders, en tot dar especiau atencion as elements de seguretat d’aguesti espacis publics infantils.
Es òbres de mantenement e optimitzacion d’aguesti parcs publics infantils an supausat ua inversion de 20.000 èuros entad Ajuntament de Vielha e Mijaran. Er objectiu principau d’aguesti trabalhs sus eth mobiliari urban destinat as mainatges e mainades ei aufrir es melhors espacis publics entàs nòsti petiti e es sues familhes.
18/09/2017