Notícies Veir istoric
Alex Moga demanarà ua amassada damb era Agence de l’Eau Adour-Garonne
Entà trabalhar amassa ena gestion der arriu Garona
Er alcalde de Vielha e Mijaran, Alex Moga, demanarà ua amassada damb era Agence de l’eau Adour-Garonne, en responsa ara prepausa deth membre dera equipa de direccion dera agéncia francesa, Joël Marty, qu’eth dimèrcles 15 d’octobre prepausèc trabalhar damb era Val d’Aran ena gestion der arriu Garona de cara a cercar solucions a problèmes futurs.
Alex Moga a arresponut ara prepausa de Marty de trabalhar amassa e a declarat que “demanaram ua reünion entà començar a trabalhar amassa peth ben deth nòste arriu e ecosistèma, donques qu’entà açò ei clau gestionar eth Garona damb França”. “Tanben volem trabalhar aguesta prepausa damb eth Conselh Generau d’Aran que hè ans que trabalhe damb entitats der aute costat dera termièra”, apuntèc eth baile aranés.
Entre es menaces que Marty exposèc eth dimèrcles en ua conferéncia en Era Audiovisuau de Vielha, destaque que, segontes diuèrsi estudis, eth cabau der arriu amendrirà ara mitat dera actuau eth 2050 se non se prenen es mesures adequades. E per açò prepausèc: “Ei important de cara ath futur trabalhar damb es persones que viuen ena neishença deth Garona, pr’amor qu’es accions que vosati hètz en arriu an incidéncia en Bordèus”.
Er Ajuntament de Vielha e Mijaran pòrte diuèrsi mesi comprometut damb eth suenh der arriu e es mejans aquatics a trauèrs deth projècte europèu Sud’Eau 2, deth qu’ei sòci actiu en tot realizar activitats entara conscienciacion dera ciutadania ena importància des arrius.
17/10/2014