Notícies Veir istoric
Comence eth programa d’espòrt popular en Vielha enquiara primauera
Er Ajuntament de Vielha e Mijaran presente un nau programa d’espòrt popular entà fomentar era activitat fisica entre toti es ciutadans
Damb er inici deth cors escolar e era tornada ara rotina dempús des vacances, er Ajuntament de Vielha e Mijaran organize amassa eth Conselh Esportiu dera Val d’Aran un programa d’espòrt popular entà totes es setmanes. Er objectiu ei promòir es valors qu’er espòrt proporcione, coma eth trabalh en equipa, ath delà der esfòrç e era vida activa e saludable entre toti es ciutadans.
Eth programa esportiu se manten damb ua frequéncia setmanau enquia junh, e compde damb activitats com: Basquetbòl es deluns, tennis de taula e/o bàdminton es dimars, fotbòl sala es dimèrcles e tennis de taula e voleibòl es dijaus. Er orari d’aguestes actiuetats esportiues ei de 20ores a 22ores e van dirigides a adults e joens, e da era possibilitat qu’es pairs poguen compartir temps damb es hilhs en tot realizar espòrt.
Aguest programa d’espòrt popular en Vielha ei gràcies ath convèni signat per Ajuntament de Vielha e Mijaran e eth Conselh Esportiu dera Val d’Aran, eth passat 11 de mai. Aguest acòrd proporcione ath municipi un tecnic esportiu pr’amor que coordine e desvolòpe era programación setmanau d’espòrt popular damb er objectiu de dinamizar es installacions esportiues municipaus.
Segons declaracions d’Alberto López, Còsso d’Espòrts der Ajuntament de Vielha e Mijaran: “aguest programa d’espòrt popular mos permet mantier e melhorar era aufèrta esportiua municipau que fomenten es ligams des ciutadans, es familhes e, ath madeish temps, promòir valors positius entre tota era poblacion, coma son es abituds de vida saludables e actius”.