Notícies Veir istoric
Vielha invertís es 80.000€ der increment dera taxa de mantenença d’aigües ena Avenguda Pas d’Arró.
Gràcies ar increment ena taxa de mantenença der aigua, er Ajuntament de Vielha e Mijaran comence es òbres d’apariament e adeqüacion der hilat d’aigua potabla dera Avenguda Pas d’Arró
Tau coma s’informèc anterioraments, er increment dera taxa de mantenença deth hilat d’aigua que li calec aprovar er Ajuntament eth passat an, a servit pr’amor que se poguen amiar a tèrme es prumères òbres d’adeqüacion deth hilat de subministrament d’aigua deth municipi de Vielha e Mijaran.
Aguest hilat compde damb nombrosi trams en un estat obsolet e eth sòn apariament e adeqüacion resulte indispensable entath sòn bon foncionament e entà garantir eth subministrament d’aigua a toti es punts deth
municipi.
Era prumèra accion que se realizarà serà ena Avenguda Pas d’Arró, donques qu’ei a on se tròbe era canerada principau que provedís eth centre de Vielha enquiar Institut. Ath delà, aguesta canerada principau tanben provedís bères parts dera Solana de Vielha.
Pendent aguesti pròplèus dies s’iniciaràn es òbres ena Avenguda Pas d’Arró, a on se tròbe eth tuèu que da servici a tota era part nauta deth pòble de Vielha. A causa d’aguestes òbres, pòt auer-i talhs puntuaus en subministrament d’aigua que se notificaran as vesins damb anticipacion a trauès des nòsti diferenti canaus sociaus e tanben a trauès dera app de participacion ciutadana.
Segons declaraue Juan Antonio Serrano, baile de Vielha e Mijaran “aguestes òbres son de besonh non solaments entà melhorar eth subministrament d’aigua, mès entà optimitzar eth sòn usatge, ath delà d’entà substituïr canalizacions que son totauments obsoletes”.
06/10/2017