Notícies Veir istoric
Joël Marty da era man entà trabalhar damb era Val d’Aran
Ena gestion der arriu Garona
Eth dimèrcles 15 d’octobre, eth director dera Agence de l’eau Adour-Garonne, Joël Marty, a presentat en Era Audiovisual de Vielha era sua conferéncia titulada ‘Presentación de l’Agence de l’Eau Adour Garonne, de sus misiones, proyectos y acciones’, ena quau a exposat es trabalhs dera organizacion francesa de cooperacion transfrontierèra en arriu Garona, en ua naua activitat deth projècte Sud’Eau 2.
Era Agence de l’eau Adour-Garonne destine 300 milions d’èuros ar an en projèctes entà lutar contra era contaminacion e protegir era aigua e es mejans aquatics dera conca deth Garona gràcies as taxes que paguen usatgèrs, indústries e eth mon agricòla, principauments.
Marty a parlat sus es futurs problèmes an arriu coma que, segontes diuèrsi estudis, eth sòn cabau serà era mitat der actuau en 2050, se non se realizen accions en sòn consum e contaminacion. Entà compensar eth descens naturau der arriu en estiu, era agéncia estúdie diuèrses mesures en tot depéner se se tracte d’ua recuperacion minima, mejana o totau deth cabau.
Fin finau, Joël Marty a lançat un messatge de cooperacion as dirigents dera Val d’Aran: “Ei important de cara ath futur trabalhar damb es persones que viuen ena neishença deth Garona, pr’amor qu’es accions que vosati amiatz a tèrme en arriu an incidéncia en Bordèus. Mos cau trabalhar amassa ena gestion deth Garona, donques compartim era madeisha conca”.
Eth tinent alcalde der Ajuntament de Vielha e Mijaran, Joaquin Puente, a volut “arregraïr era sua preséncia, donques conferéncies coma aguesta mos ajuden a hèr préner consciéncia as nòsti vesins sus eth consum, tractament e papèr der aigua en nòste ecosistèma qu’ei privilegiat”.
Aguest eveniment se trape laguens deth marc deth projècte Sud’Eau 2 e preten hèr préner consciéncia ara ciutadania sus era importància dera preservacion dera aigua e es arrius.