Notícies Veir istoric
Era Òbra Sociau “La Caixa” destine 15.000€ entara crompa de mobiliari e materiau audiovisuau entath Centre Juvenil.
Es joens e adolescents hèn part d’un collectiu dera societat vulnerables e fòrça escadences ath sòn entorn e per aguest motiu ei de besonh aplicar politiques juveniles de prevencion. Ua des accions mès importantes ei era creacion d’un espaci d’amassada, a on es joens poguen desvolopar-se coma ciutadans.
Actuauments, en Vielha e Mijaran i a mes de 20% dera poblacion que son joeni d’edats comprenudes entre es 10 e es 30 ans. Entà arténher un corrècte desvolopament d’aguest collectiu, credem essenciau aufrir-les un espaci permanent en quau poguen desvolopar activitats culturaus, ludiques o professionaus. Era instauracion aguest locau sociau entà joeni, ath delà de considerar-se ua aufèrta ludica, tanben ei un metòde de prevencion pr’amor qu’es joeni de Vielha e Mijaran non degalhen es sues ores en carrèr o en tot exercir activitats perjudiciaus coma eth botellon. Un aute factor fòrça important a tier en compde en nòste territòri ei era climatologia, que limite es activitats d’òci un còp arribe era nhèu.
Per toti aguesti motius, aué 24 d’octobre, er Ajuntament de Vielha e Mijaran a signat un convèni de collaboracion damb era Òbra Sociau “La Caixa” en quau se promò era realizacion deth projècte deth locau sociau entà joeni e destine 15.000€ que s’invertiràn en mobiliari de besonh dera sala e tanben en materiau audiovisuau pr’amor qu’es joens poguen realizar es sues activitats. Atau madeish tanben se signarà a inicis eth pròplèu an, un aute convèni dera madeisha quantitat que s’invertirà de nau en Centre Juvenil.
Segontes Juan Antonio Serrano, baile de Vielha e Mijaran “èm fòrça content e arregraïdi ara Òbra Sociau “La Caixa” pera sua implicacion en aguest projecte qu’ei tan de besonh entà Vielha e Mijaran.“ Ath delà Serrano soslinhe que “ei de vitau importància qu’es joeni agen un lòc entà eri en quau poguen realizar es sues activitats d’òci e quitament auer un lòc en quau poguen promòir es sues inquietuds e interèssi professionaus o empresariaus”.
Entà Joaquim Macià, director banc d’Institucions de CaixaBank en Catalonha, “des dera Òbra Sociau “La Caixa” contunham trabalhant entà arténher ua societat damb mès oportunitats, en tot impulsar iniciatiues sociaus com ei eth cas d’aguest locau, en tot invertir ena recèrca e educacion e en tot difóner cultura e sciéncia. E tot, entà seguir ajudant a d’aqueri qu’ac an mès de besonh”.