Notícies Veir istoric
Era Bibliotèca Generau de Vielha e er Ajuntament de Vielha e Mijaran organizen eth dusau concors de microrelats via Twitter e eth prumèr concors de fotografia “Eth mèn repopet”
Andues activitats son laguens des actes de celebracion des 16 ans dera Bibliotèca de Vielha en tot èster eth concors fotografic part des activitats deth cicle “Libres entà créisher” que coordine era pedriatra Inma Caubet
Era Bibliotèca Generau de Vielha e er Ajuntament de Vielha e Mijaran organizen un concors de microrelats en aranés entà Twitter entà aguest mes de noveme. Aguesta iniciativa s’enquadre laguens des actes de celebracion deth 16 anniversari dera Bibliotèca, que s’amiaràn a tèrme damb diuèrses activitats pendent eth mes de noveme.
Eth concors a dues categories: de 12 a 17 ans e majors de 18 ans. Eth tèrme de liurament des relats ei eth 20 de noveme, e s’auràn d’enviar en un solet messatge via Twitter, ath delà de seguir eth compde de Twitter dera Bibliotèca de Vielha (@bibliovielha) e en tot etiquetar-la en madeish. Entà d’aqueri menors de 16 ans que volguen participar pòden enviar es sòns relats a bibliotèca@vielha-mijaran.org. Es bases deth concors se tròben ena plana web der Ajuntament de Vielha e Mijaran.
Era tematica deth relat ei liure, a d’èster escrit en aranés e de creacion pròpria. Es tweets o microrelats an d’auer un minim de sies paraules. Eth jurat serà format peth personau dera Bibliotèca de Vielha e eth liurament de prèmis s’amiarà a tèrme en un acte eth dia 24 ena madeisha bibliotèca.
Per un aute costat, era Bibliotèca de Vielha tanben cree eth prumèr concors de fotografia “Eth mèn repopet”, iniciativa dera doctora Inma Caubet, qui des de ja hè temps collabòre damb era Bibliotèca en tot organizar era activitat “Libres entà créisher”. Aguest concors preten fomentar era creativitat entre pairs e mairs a trauès de fotografies dera vida quotidiana des repopets. Entà concursar sonque cau enviar era fòto ath email bibliotèca@vielha-mijaran.org abantes deth 20 de noveme. Eth liurament de prèmis s’amiarà a tèrme eth dia 23 de noveme, laguens des actes de celebracion deth 16 aniversari dera Bibliotèca que se desvoloparàn pendent tota aguesta setmana. Es prèmis entàs dus concorsi seràn dues entrades entath concèrt de gospel organizat per Ajuntament eth dia 7 de deseme, dues entrades entara pista de gèu deth Palai de Gèu e dues entrades entara programacion annau culturau e familhara der Ajuntament.