Notícies Veir istoric
Vielha e Mijaran acuelh era “Hèsta dera Lan”
Es dies 7, 8 e 9 de deseme s’amiarà a tèrme era “Hèsta dera Lan” en Palai d’Espòrts de Vielha, ua hèsta qu’a coma objectiu era revaloracion dera lan des races autoctònes des Pirenèus.
Er Ajuntament de Vielha e Mijaran acuelh era “Hèsta dera Lan” pendent es pròplèus 7, 8 e 9 de deseme. Aguesta ei ua iniciatiua de Carmen Bonifaci, fondadora deth talhèr textil de Bausen e professionau deth mon dera lan des de hè mès de quaranta ans.
Er objectiu d’aguesta hèsta ei era revaloracion dera lan des races d’oelhes autoctònes deth Pirenèus damb era intencion d’apuar e fomentar era ramaderia locau e conservar era diuersitat ovina enes Pirenèus.
Era Hèsta dera Lan preten amassar artesans que trabalhen era lan de diferentes formes damb er objectiu de compartir experiéncies e mostrar ath public es diferentes creacions artesanaus deth mon dera lan de lòcs coma Catalonha, França, Aragon, Madrid, Cantàbria e per descompdat, era Val d’Aran.
Era hèsta se desvoloparà en Palai d’Espòrts de Vielha, de 15h a 22h, damb un mercat e demostracion de productes artesanaus de lan. Eth dia 7 ara 19h s’amiarà a tèrme era inauguracion oficiau qu’anarà seguida d’ua desfilada de mòda. Eth dia 8 peth maitin, de 9h a 13h se realizarà ua amassada d’artesans damb er objectiu de méter eth comun es sòns objectius e experiéncies.
Maria Vergés, còsso de cultura soslinhe que “aguesta hèsta preten hèr conéisher d’ua banda, eth trabalh des artesans e per un aute vò méter en valor un producte autoctòn d’Aran com ei era lan”.
28/11/2017