Notícies Veir istoric
Vielha e Mijaran aurà un Plan d’Igualtat d’Oportunitats en 2018
Er Ajuntament de Vielha e Mijaran a iniciat es trabalhs entà redigir eth Plan Municipau d’Igualtat d’Oportunitats qu’a de definir e concretar es politiques a portar a tèrme entà potenciar era igualtat d’oportunitats de genre en encastre lo
Er airau d’accion sociau der Ajuntament de Vielha e Mijaran a encomanat era redaccion deth Plan d’Igualtat d’Oportunitats entà dotar-se d’un esturment entà establir accions concrètes tà esvitar es desigualtats per qüestion de genre en municipi.
Entà Maria Vergés, còsso d’accion sociau deth consistòri: “actuaument existís un ampli consens en reconeishement dera situacion de desigualtat ena que se trapen es hemnes en fòrça àmbits e, tot e que i auut auanci legaus e sociaus, ei de besonh encara fòrça esfòrç entà arténher ua equiparacion reau respècte des òmes”.
Aguest Plan a estat encomanat a ua empresa extèrna, especialista en aguesti tèmes e qu’ath delà incidís e apregondís enes qüestions de genre enes lòcs ruraus e de montanha “hèt que mos interèsse especiaument, pr’amor qu’era realitat d’ua hemna dera Val d’Aran non ei era madeisha qu’era d’ua hemna d’ua ciutat” higie Vergés.
Er objectiu d’aguest plan ei eth de dessenhar diuèrses accions que poguen desvoloparse a diferents nivèus, en tot amiar a tèrme trabalhs de formacion (talhèrs, corsi, conferéncies…) atau coma estratègies qu’incidisquen dirèctament enes activitats quotidianes dera populacion entà arténher ua màger conscienciacion. Eth plan ei plantejat en dues fases: ua prumèra fasa a on s’amiaran a tèrme trabalhs d’investigacion e remassada de donades e ua dusau fasa de diagnòsi e propòstes a desvolpar des der Ajuntament.
“Era elaboracion d’aguest Plan ei un compromís der Ajuntament de Vielha e Mijaran entà melhorar es condicions d’igualtat entre òmes e hemnes deth municipi en tot desvolopar propòstes practiques e realistes tà artenhe’c” manifestaue era còsso d’accion sociau Maria Vergés.
Era prevision ei qu’eth document sigue acabat en junh de 2018, moment en qué se presentarà publicament as vesins de Vielha e Mijaran.
28/11/2017