Notícies Veir istoric
Vielha e Mijaran reclame major eficàcia en servici de recuelhuda de lordères
Er Ajuntament de Vielha e Mijaran a sollicitat ath Conselh Generau d’Aran qu’amie a tèrme es accions de besonh entà solucionar urgentament aguesta situacion que deteriòre era imatge tant deth municipi coma dera rèsta dera Val d’Aran
Pendent eth pònt dera constitucion Vielha e Mijaran a viscut ua situacion fòrça complicada per çò que hè ath servici de remassada de lordères. Juan Antonio Serrano, alcalde de Vielha e Mijaran manifestaue que: “tot e es esfòrci der ajuntament entà facilitar er accès dera maquinària e des operaris dera empresa responsabla deth servici, era eficàcia ena recuelhuda a estat totaument insufisenta” e higie “auem vist contenedors plei e desbordadi qu’an balhat ua imatge deth nòste municipi fòrça lamentabla”.
Pr’amor d’açò er Ajuntament de Vielha e Mijaran s’a adreçat ath Conselh Generau d’Aran entà qu’amie a tèrme de forma urgent es gestions e accions de besonh damb era empresa adjudicatària deth servici tà qu’aguesta situacion se solucione e non se torne a repetir.
“Èm conscients qu’eth personau dera empresa responsabla hè tot çò qu’ei enes sues mans entà prestar un bon servici, totun ei imprescindible que s’amien a tèrme cambis entà evitar situacions coma era viscuda aguesti dies endarrèr” declaraue Serrano.