Notícies Veir istoric
Er Ajuntament de Vielha e Mijaran presente eth projècte Interreg-POCTEFA “Reiaume der Aneto” ara Fondacion deth Musèu Etnologic dera Val d’Aran
Pendent era amassada s’avalorèren es accions a desvolopar en airau culturau e patrimoniau entre Vielha e Mijaran, Benasque e Luchon, en tot méter en contacte as entitats des tres municipis que trabalhen en aguesti ahèrs
Ager dimars era dusau tinent d’alcalde, Maria Vergés, s’amassaue ena sedença der Ajuntament de Vielha e Mijaran damb es representants dera Fondacion deth Musèu Etnologic dera Val d’Aran entà presentar-les formaument eth projècte Interreg-POCTEFA “Reiaume der Aneto” de cooperacion transfronterèra.
Laguens des ahèrs tractadi s’avalorèren es possibilitats de relacion e cooperacion damb diuèrsi agents culturaus de Benasque e Luchon, coma ei era “Fundación Hospital de Benasque”, que tanben trabalhe en airaus fòrça similars as que desvolope era Fondacion Musèu Etnologic.
Entà Maria Vergés “un des objectius importants d’aguest projècte transfronterèr ei eth de capitalizar es relacions damb es agents estrategics deth territòri, e en Vielha e Mijaran ei evident qu’era Fondacion deth Musèu Etnologic n’ei un referent en matèria culturau e patrimoniau”.
Enes pròplèu setmanes s’amiarà a tèrme ua trobada entre es representants des tres municipis en encastre dera cultura, entà establir dejà es accions concrètes a amiar a tèrme.
31/01/2018