Notícies Veir istoric
Magràs arribe en Vielha e Mijaran
Un an mès Vielha e Mijaran se premanís entà celebrar era hèsta de Magràs, sus tot damb es mès petiti.
Eth dia 9, s’eth temps ac permet, s’amiarà a tèrme eth passacarrèr dera Escòla Garona de Vielha e era Escòla Infantiu “Era Cunhèra” que serà alegrada per un grop de batucada aufrit per l’Ajuntament e qu’animarà era hèsta pes carrèrs de Vielha. Tot seguit, coma er an passat, er AMPA aufrirà un esdejoar entà toti es escolans dera escòla. Pendent era tarde deth madeish dia 9, en Palai de Gèu de Vielha tanben se celebrarà era hèsta de magràs ena pista de gèu, e toti aqueri que venguen disfressats poderàn patinar de franc.
Com ja se comencèc a celebrar hè dus ans, eth dissabte 10, ath Palai d’Espòrts de Vielha, l’Ajuntament aufrís ua hèsta de magràs damb er espectacle familhau deth grop Sidral "Es joens joglars".
Entà Maria Vergés, còssa de cultura "un des nòsti objectius era matèria culturau ei era d’apropar era activitat culturau a toti, e en especiau as mès petiti, donques que viuem aluenhadi des lòcs a on era aufèrta culturau ei mès variada” e ahigie “magràs ei ua hèsta tradicionau que volem sajar potenciar, ei per açò que des de l’Ajuntament collaboram damb era Escòla Garona en aguesta celebracion”. Ath delà Vergés ahig que "tanben volem dar es gràcies ar AMPA pera sua collaboracion en aguesta celebracion" .
06/02/2018