Notícies Veir istoric
Vielha e Mijaran presente es prumères Jornades Europèes de Cinema de Montanha
Laguens des activitats deth projècte de cooperacion transfronterèra Interreg-Poctefa “Reiaume der Aneto” e en marc deth Mendi Tour Bilbao Mendi Festival
Vielha e Mijaran acuelherà es pròplèu dies 9 e 10 mes de març es prumères Jornades Europèes de Cinema de Montanha, enmarcades laguens des activitats desvolopades en marc deth projècte de cooperacion transfronterèra Interreg-Poctefa “Reiaume der Aneto” e qu’er Ajuntament organize amassa damb eth Mendi Tour Bilbao Mendi Festival e damb era aupinista Edurne Pasaban. Aguestes jornades dedicades ath cinèma de montanha s’amiaràn a tèrme ena sala Era Audiovisuau de Vielha.
Pendent es dus dies se poderan vier un totau de cinc films, toti eri premiadi ena edicion de 2017 deth Bilbao Mendi Film Festival. Atau madeish, pendent es Jornades, se daran a conéisher es premiadi en Prumèr Concors de Cuermetratges a trauès de telefon mòbil “Vielha e Mijaran: montanha e cinema”, qu’er Ajuntament organize tanben laguens deth marc deth projècte “Reiaume der Aneto” e deth que se pòt consultar es bases ena plana web der Ajuntament de Vielha e Mijaran.
Es entrades des Jornades se pòden recuélher en Ajuntament de Vielha e Mijaran de forma gratuïta, damb un maxim de cinc entrades per persona, en orari de deluns a diuendres de 8 a 14 ores e es dimèrcles de 16,30 ores a 19 ores o ben ena agéncia Kabi Travels (avgda. Pas d’Arró, 40 de Vielha)
Entà Maria Vergés, dusau Tinent d’Alcalde e còsso de cultura der Ajuntament de Vielha e Mijaran “aguestes prumères jornades son ua des activitats que realizam a trauès deth projècte “Reiaume der Aneto” que compartim damb Luchon e Benasque, es quaus ja compden damb un festivau consolidat d’aguestes caracteristiques” e higie qu’aguest eveniment “supause un pas mès entà contunhar poscionant Vielha e Mijaran coma un referent de montanha ath viatge qu’apropam era cultura e es valors qu’apòrte era montanha ara societat”.
22/02/2018