Notícies Veir istoric
Era Bibliotèca Generau de Vielha inicie es activitats de Sant Jòrdi damb un conde encadeat a trauès de twitter
A trauès d’aguest concors se preten dinamizar er aranés entre es mès joeni en tot emplegar es hilats sociaus damb motiu dera celebracion deth Dia deth Libre
Era Bibliotèca Generau de Vielha a
començat a organizar es activitats entà celebrar eth Dia deth Libre damb motiu
dera hèsta de Sant Jòrdi. Enguan, ath delà d’un gran nombre d’activitats des
que se’n darà tota era informacion mès entà deuant, organize un concors via
twitter d’un conde encadeat.
Entà participar-i ei de besonh
seguir eth compde de twitter dera Bibliotèca e hèr ua “piulada” en tot citar
eth twit anterior a compdar der iniciau que propòse era Bibliotèca Generau de
Vielha.
Eth tèma deth relat ei liure e a d’èster
de creacion pròpria e non auer estat premiat en cap aute concors. Era data
limit entà enviar eth tèxte ei eth 19 d’abriu.
Entà Maria Vergés, 2au Tinent d’Alcalde
e còsso de cultura der Ajuntament de Vielha e Mijaran: “pensam qu’aguesta
activitat ei ua bona forma d’apropar era lengua as mès joeni en un encastre que
les ei fòrça familhar coma son es hilats sociaus” e higie que “des der
Ajuntament de Vielha e Mijaran sajam d’aportar eth nòste gran de sable ara
dinamizacion e normalizacion der aranés e damb era collaboracion e implicacion
deth personau dera Bibliotèca Generau de Vielha que podem amiar endauant
activitats d’aguest tipe”.