Notícies Veir istoric
Vielha e Mijaran s’ahigís ath Dia Mondiau dera Activitat Fisica en tot fomentar er espòrt enes installacions esportives municipaus
Eth 6 d’abriu se celèbre eth Dia Mondiau dera Activitat Fisica, damb era collaboracion de desparièrs organismes e institucions tà promòir es beneficis de portar ua vida saludabla e ena que non pòt mancar er exercici fisic. Era activitat física ei importanta entà esvitar fòrça malauties, tà enfortir es uassi e muscles e proporcionar benèster psicologic.
Er ajuntament de Vielha e Mijaran, un an mès, s’ahigís ad aguesta iniciativa en tot organizar fòrça activitats gratuïtes e dubèrtes a toti, pendent diuèrsi dies enes installacions esportives municipaus. En aguest sens, eth dia 3 d’abriu, eth Palai de Gèu acuelhec ua clase de iòga, mentre qu’en Palai d’Espòrts de Vielha se podec practicar espòrts coma eth badminton e eth tennis taula. Eth dia 4, eth futbòl sala en Palai d’Espòrts e eth powerdump en Palai de Gèu, preneren eth relèu. Eth dia 5 siguec eth torn dera marcha nordica, atau coma deth vòleibol e eth badminton, e ua clase de zumba en Palai de Gèu. Eth dia 6, es activitats deth Dia Mondiau dera Activitat Fisica finalizen damb ua session de spinning en Palai de Gèu.
Des der ajuntament se trebalhe entà potenciar era imatge de Vielha coma referent esportiu laguens dera Val d’Aran, en tot fomentar ath long der an un gran conjunt d’activitats esportives autant enes installacions esportives municipaus (Palai de Gèu e Palai d’Espòrts) coma ar aire liure, en tot promòir ua grana simbiòsi entre era natura e er espòrt. En aguest sens, aguesta primauera torne a iniciar-se un nau cicle de gessudes de marcha nordica a compdar deth pròplèu 14 d’abriu. Ua activitat que cada viatge, artenh era participacion de mès gent.
Segontes eth còsso d’Espòrts, Joenessa e Naues Tecnologies, Alberto López, “des der ajuntament de Vielha e Mijaran potenciam er exercici físic pendent tot er an, damb fòrça activitats damb es qué volem conscienciar ara poblacion deth besonh de practicar quinsevolh tipe d’espòrt entà auer ua vida saludabla. En municipi compdam damb ues granes installacions esportives, a on se pòden realizar un gran conjunt d’espòrts adaptadi as besonhs dera gent”.
06/04/2018