Notícies Veir istoric
Eth baile de Vielha e Mijaran, Juan Antonio Serrano, s’a amassat en Madrid damb nauti cargues deth Ministèri de Foment e dera Comission Europèa de Transpòrt e Torisme tà parlar sus era N-230
Ena amassada i a estat present eth deputat provinciau, Francés Boya, e an transmetut era preocupacion deth territòri per impacte ambientau e socioeconomic des diuèrses alternatives prepausades per Foment
Aguest deluns, eth baile de Vielha e Mijaran, Juan Antonio Serrano e eth deputat provinciau, Francés Boya, s’an amassat en Madrid damb responsables deth Ministèri de Foment entà parlar sus era N-230. Ena amassada, ara que tanben i a assistit era membre titular dera Comission Europèa de Transpòrt e Torisme e portavotz deth grop S&D dera Comission de Contròtle Pressupostari, Inés Ayala, s’a transmetut era preocupacion actuau que i a ena Val d’Aran, e especiauments, en municipi de Vielha e Mijaran, pes diuèrses alternatives que Foment a presentat entà amiar a tèrme era reforma dera N-230 des dera Boca Nòrd deth Tunèl de Vielha enquia Aubèrt.
Segontes Serrano: “Ena amassada auem transmetut eth besonh d’optar per un traçat qu’age eth menor impacte possible, autant mediambientau coma socioeconomic e toristic tath municipi. En aguest sens, lis auem trasladat era preocupacion qu’existís en territòri damb aguesta infraestructura, en tot tier en compde que viuem, ena màger part, deth torisme”.
Autant Serrano coma Boya an arregraït era disponibilitat deth Ministèri entà mantier un dialòg sus aguest ahèr, entant qu’aguest ei un projècte de vitau importància entara Val d’Aran. Es dus representants politics an considerat qu’ère tanplan important qu’ua eurodeputada damb es responsabilitats d’Inés Ayala en contròtle pressupostari e infraestructures age estat present en aguesta amassada.
Eth deputat provinciau, Francés Boya, a manifestat que “i a eth besonh de qu’era N-230 en sòn tram dera Val d’Aran sigue tractada d’ua forma qu’intègre toti es municipis, e per tant, s’estudien totes es variantes possibles tanben enes pòbles de Baish Aran”.
Pendent era amassada tanben se lis a demanat que poguen amiar a tèrme es òbres pendentes, çò de mès lèu posible, en Baish Aran, concretaments enes municipis de Bossòst e Les, tà minimizar er impacte deth transit pesat enes trauèsses urbanes d’aguesti pòbles.
Ath delà, Serrano a mostrat era sua preocupacion pes darrèri episòdis d’esbauçaments que s’a patit ena N-230 pendent es darrèri dies en parçan d’Escales e, en aguest sens, a demanat recorsi entà milhorar era seguretat d’aguesta via.