Notícies Veir istoric
Er Ajuntament de Vielha e Mijaran destinarà enguan 985.000€ a Inversions entath municipi
En plen extraordinari deth consistòri s’a aprovat era 2au modificacion deth pressupòst per valor d’1.711.987,63€, e, ath delà, s’a confirmat un superavit d’1.354.634,64€ der exercici de 2017
Eth plen der Ajuntament de Vielha e Mijaran a aprovat en session extraordinària era 2au modificacion deth pressupòst d’enguan per valor d’1.711.987,63€. Era bona situacion economica actuau deth consistòri, en que s’a eliminat eth deute, permet que pendent aguest an se destinen 985.000€ a inversions entath municipi. Es principaus accions que s’amiaràn a tèrme son principaument er apariament e mantenement de diuèrsi carrèrs de Vielha: Conservacion deth parcatge dera Plaça dera Generalitat de Catalonha, ena confluéncia entre es arrius Nere e Garona, era melhora der hilat de clavegueram e aigua potabla en Carrèr Bergàs e era substitucion der hilat d’aigua e apariament des pas de pedanhs en Carrèr Montcorbison. Aguestes tres accions, catalogades coma financerament sostenibles, supausen lèu 300.000€, e provien deth superavit der an 2017, avalorat en 1.354.634,64€. Aguesta inversion ei possibla gràcies ath decrèt qu’enguan a aprovat eth govèrn espanhòl que permet as ajuntaments reinvertir eth sòn superavit de manèra immediata.
Atau madeish, d’autes accions que s’amiaràn a tèrme son eth bastiment deth centre de joenessa en antic aucider, era reforma dera sala polivalenta, e eth bastiment d’ua pista poliesportiva exteriora e deth skate park ath cant deth Palai d’Espòrts. Ath delà, se crearà ua zòna de picnic en Prat de Teishiineret (Cap dera Vila) e s’apariaràn es cloradors des dipòsits d’aigua.
Per un aute costat, e a conseqüéncia des condicions climatologiques d’aguest darrèr iuèrn, s’a ampliat ua partida, apruprètz de 150.000€, destinada ath mantenement des carrèrs e ara reforma des accèssi as diuèrses pedanies municipaus, que s’executaràn de manèra immediata aguesta primauera.
Segontes eth baile de Vielha e Mijaran, Juan Antonio Serrano: “Èm contents d’auer podut amiar endeuant aguesta modificacion deth pressupòst, sustot pr’amor qu’era quantitat que destinam enguan a inversions supause eth 60% d’aguesta modificacion. Dempús de fòrça ans economicament complicadi entath consistòri, ara compdam damb un ajuntament sanejat e poderam realizar desparières òbres de govèrn enes pròplèus mesi”.
Aguesta 2au modificacion deth pressupòst s’a aprovat damb es vòts a favor deth govèrn municipau d’Unitat d’Aran e tanben deth grop de Ciutadans, mentre que Convergéncia Democratica Aranesa s’a abstengut.
26/04/2018