Notícies Veir istoric
Mès de 230 patinadors participèren aguesta dimenjada en Palai de Gèu de Vielha en Campionat d’Espanha, Copa Federacion e Copa d’Espanha de Ballet Infantil
Enguan er ajuntament de Vielha e Mijaran destinarà mès de 150.000€ entà milhorar es installacions deth Palai de Gèu
Pendent aguesta passada dimenjada, eth Palai de Gèu de Vielha acuelhec diuèrses competicions estataus de patinatge sus gèu: Campionat d’Espanha, Copa Federacion e Copa d’Espanha de Ballet Infantil. Mès de 230 patinadors arribadi de diuèrsi endrets d’Espanha preneren part d’aguestes competicions, en tot mostrar eth gran potenciau qu’installacions com aguestes an entà acuélher pròves esportives d’aguest nivèu. En totau sigueren 3 dies, a on tanben i participèren patinadors deth CEGVA. Cau remercar era quatau e cincau posicion, respectivaments, de Lucia Sánchez e Claudia Capdevila en Campionat d’Espanha Infantil.
Segontes eth còsso d’Espòrts de Vielha e Mijaran, Alberto López: “Èm fòrça contents de coma a anat era organizacion d’aguesti campionats, a on s’a demostrat qu’eth municipi de Vielha e Mijaran ei capable d’acuélher competicions estataus de naut nivèu, en tot plaçar-mos coma ua destinacion esportiua d’iuèrn de referéncia en Espanha”.
Enguan, er ajuntament de Vielha e Mijaran invertirà mès de 150.000€ entà milhorar es condicions deth Palai de Gèu. En aguest sens, destaque era inversion en maquinària, neteja, combustibles e eth sistèma de climatizacion, atau coma er enlumenat LED. Un seguit d’actuacions entà qu’aguest equipament contunhe en tot milhorar es sòns servicis entàs usatgèrs.
“Eth govèrn municipau de Vielha e Mijaran cre e apòste peth Palai de Gèu coma ua installacion de qualitat referent ena Val d’Aran. Aguesta sason d’iuèrn auem acuelhut fòrça competicions de patinatge sus gèu, curling e hockey sus gèu, e trebalham entà qu’es pròplèus ans, ne pogam auer mès”, higís López.
01/05/2018