Notícies Veir istoric
Es TEDAX detonen ua petita bomba dera Guèrra Civila en municipi de Vielha e Mijaran
Se tracte d’un mortèr de 81 milimètres e damb ua carga de lèu 1 quilò de pes que s’a trapat un vesin ena ribèra de Vielha
Tath tor des 14:00 un grop des TEDAX a detonat ua petita bomba dera Guèrra Civila enes montanhes deth parçan d’Orno, en municipi de Vielha e Mijaran. Se tracte d’un mortèr de 81 milimètres que compdaue damb ua carga de lèu 1 quilò de pes. Era explosion s’a hèt de manèra contarotlada, en tot tier en compde era seguretat dera gent.
Eth mortèr a estat trapat per un vesin deth municipi de Vielha e Mijaran a prumèra ora deth maitin mentre cercaue misharnons ena ribèra de Vielha. En aqueth moment, s’a dat er avís ar ajuntament, qu’ath madeish viatge, ac a metut en coneishença dera Guàrdia Civila, entà qu’activèsse eth protocòu abituau en aguest tipe d’eveniments.
Enquiath lòc dera detonacion s’i a desplaçat ua equipa dera Guàrdia Civila damb era còsso de Mediambient de Vielha e Mijaran, Elena Vidal. Un viatge hèta era explosion, es TEDAX se n’an emportat eth mortèr entà contunhar damb es investigacions avientes.
Segontes eth baile de Vielha e Mijaran, Juan Antonio Serrano: “Un viatge auem coneishut era preséncia deth mortèr, auem avisat ara Guàrdia Civila entà qu’amièsse a tèrme es passi avienti. Çò de mès important, en aguest cas, a estat actuar en favor dera seguretat des ciutadans atau coma dera zòna a on s’a trapat er artefacte”.