Notícies Veir istoric
Er Ajuntament de Vielha e Mijaran, eth Conselh Generau, era Deputacion de Lleida e era Generalitat signen formaument es allegacions conjuntes ar estudi de condicionament dera N-230 deth Ministèri de Foment
Es quate institucions an acordat refusar es quate prepauses presentades per Foment
Er Ajuntament de Vielha e Mijaran a signat eth conjunt d’allegacions ar estudi de condicionament dera N-230 deth Ministerio de Fomento, en ua presentacion damb era Deputacion de Lleida, era Generalitat de Catalunya, a trauès deth departament de Territòri e Sostenibilitat e eth Conselh Generau d’Aran.
Aguesta signatura, qu’a agut lòc ena sedença dera Deputacion de Lleida, a estat signada peth baile de Vielha e Mijaran, Juan Antonio Serrano, eth president dera Deputacion de Lleida, Joan Reñé, eth secretari d’Infraestructures e Mobilitat dera Generalitat de Catalonha, Ricard Font e eth síndic d’Aran, Carlos Barrera.
Es allegacions an compdat damb eth supòrt unanim des pedanies de Vielha e Mijaran, en tot refusar es quate prepauses que Foment presentèc en sòn dia. D’aguesta manèra, ara se daurís un nau espaci de temps entà qu’era institucion espanhòla pogue tornar a aufrir naues alternatives. Des deth territòri non se descarte era possibilitat dera construccion d’un tunèl entà esvitar era circulacion deth transpòrt pesat per Vielha e Mijaran, en tot gésser en pònt d’Arròs.
Segontes eth baile de Vielha e Mijaran, Juan Antonio Serrano, “èm satisfèti deth trabalh que s’a amiat a tèrme entre es diuèrses administracions, damb es tecnics, entà poder presentar es allegacions avientes ar estudi de Fomento. Credem qu’es prepauses èren fòrça nocives entath municipi de Vielha e Mijaran e tath conjunt dera Val d’Aran, sustot per impacte mediambientau, economic e toristic que comportauen. Demoram, ara, que Fomento estudie es allegacions e enes pròplèu mesi pogue préner consciéncia des besonhs qu’a eth territòri ath torn d’ua problematica fòrça importanta coma ei eth transpòrt pesat des dera Boca Nòrd deth Tunèl de Vielha enquiara termièra francesa”.
29/05/2018