Notícies Veir istoric
Er Ajuntament de Vielha e Mijaran apròve per unanimitat es allegacions presentades ar estudi de condicionament dera N-230
Totes es fòrces politiques deth consistòri ratifiquen eth refús as quate prepauses deth Ministerio de Fomento, en tot demorar qu’en 18 mesi i pogue auer naues alternatives que compden damb eth supòrt deth territòri
Aguest dimèrcles, pendent eth plen ordinari der Ajuntament de Vielha e Mijaran, s’a aprovat per unanimitat eth conjunt d’allegacions ar estudi de condicionament dera N-230, en tot refusar es quate alternatives prepausades peth Ministerio de Fomento, pes impactes mediambientaus, economics e toristics qu’aurien. En aguest sens, s’a ratificat eth conjunt d’allegacions que signèren eth pròpri consistòri amassa damb eth Conselh Generau d’Aran, era Deputacion de Lleida e era Generalitat de Catalunya.
Segontes eth baile de Vielha e Mijaran, Juan Antonio Serrano, “èm fòrça contents per auer artenhut un acòrd unanim, non sonque en municipi damb eth supòrt des pedanies, senon de tota era Val d’Aran, coma manifestèren era rèsta de municipis pendent eth darrèr Conselh Consultius de Bailes. Ath delà, ei istoric qu’es quate administracions ajam presentat es madeishes allegacions, e ara demoram que Fomento prengue consciéncia dera importància de prepausar un projècte que pogue compdar damb eth supòrt de tot eth territòri, pr’amor qu’era reforma dera N-230 implique a tota era Val d’Aran”.
Laguens deth conjunt d’allegacions se demane a Fomento que considère era sua posicion e que pendent es pròplèu 18 mesi pogue presentar naues alternatives qu’agen eth supòrt deth territòri. En aguest sens, ua des prepauses que se poirie méter dessús dera taula, ei eth bastiment d’un tunèl abantes d’arribar en Vielha e qu’acabèsse en pònt d’Arròs.
Pendent eth plen tanben s’a aprovat iniciauments eth Document Unic de Proteccion Civiu (DUPROCIM) que servís entà amassar es diuèrsi plans d’emergéncies municipaus, en tot èster vigent pendent es pròpleu quate ans.
30/05/2018