Notícies Veir istoric
Er Ajuntament de Vielha e Mijaran realize melhores ena pista de gèu entà solucionar es problèmes d’umitats que patís era installacion
Se substituís eth socòl, era lòna de plastic que corbís era pista, e ua part des tanques perimetraus que melhoraràn era impermeabilizacion e evitaràn es umitats ena planta 0
Aguesta primauera ja se trabalhe en melhorar es installacions deth Palai de Gèu. Era prumèra des actuacions que s’amie a tèrme ei era reforma dera pista de gèu. En aguest sens, se substituís eth socòl d’uns 160 mètres que protegie era lòna de plastic dera pista (que tanben se cambie) entà melhorar era impermeabilizacion, pr’amor qu’auien apareishut umitats en pis inferior, a on se troben es sales de fitness, aeròbic, spinning e karate. Ath delà, se substituirà ua tresau part des tanques perimetraus que protegissen era pista de gèu, apuprètz 40 mètres.
Segontes
eth còsso d’Esports de Vielha e Mijaran, Alberto López,"eth
Palai de Gèu ei ua des prioritats der equip de govèrn, pr’amor
qu’ei ua des infrastructures clau en airau esportiu. Per açò,
pendent aguesta primauera realizam melhores ena pista de gèu, e en
ostiu contunharam damb mès trabalhs de melhora ena climatizacion e
desumidificacion d’aguest equipament".
Aguestes
òbres finalizaràn pendent eth mes de junh, pr’amor que de cara a
junhsèga a d’èster en condicions, quan comencen es activitats de
gèu damb diuèrsi stages de patinatge artístic que duraràn tot er
ostiu.
11/06/2018